Уйғур елида йәнә 9 киши "торда қанунға хилап учурларни тарқитиш җинайити" билән бир тәрәп қилинған

Мухбиримиз ирадә
2018-04-12
Share

Уйғур аптоном районлуқ даириләр "интернет торида қанунға хилап учурларни тарқитиш җинайити" билән йәнә 9 делони бир тәрәп қилған.

"хәлқ гезити" ниң бу һәқтики хәвиридин мәлум болушичә, бу қетим бир тәрәп қилинған 9 дело мушу хилда бир тәрәп қилинған он иккинчи түркүмдики делолар икән. Хәвәрдә мәзкур делоларға четишлиқ кишиләрниң "алақә тори қатарлиқ супилардин пайдилинип, зораванлиқ-террорлуқ, диний әсәбийлик, миллий бөлгүнчилик, питнә-иғва вә ялған учур қатарлиқ мәзмунларға четилидиған язмилар, сүрәтләр вә үн-синларни сақлап тарқатқанлиқи" илгири сүрүлгән.

Хәвәрдә мәзкур 9 делоға четилип бир тәрәп қилинған кишиләрниң 5 нәпири уйғур, 1 нәпири өзбек, 3 нәпири хитай икән. Уйғур вә өзбек тор қолланғучилириниң һәммиси диний материялларни, зораванлиқ вә террорлуққа аит мәзмунларни көрүш вә яки сақлаш қатарлиқ җинайәтләр билән әйибләнгән. 3 Нәпәр хитай болса үндидар епидә сиясий җәһәттики питнә-иғваларни тарқитиш, қанунсиз йиғилиш тәшкилләш дегән җинайәтләр билән әйибләнгән. Һалбуки, 3 нәпәр хитай пәқәт мәмурий җәһәттин тохтитип қоюш җазаси берилгән болса, қалғанларниң һәммисигә җинайи ишлар қануни бойичә тохтитип қоюш җазаси берилгән.

Чәтәлләрдики уйғур көзәткүчиләр бу һәқтә пикир баян қилип, юқириқи әһвалларни кишиләрниң әң негизлик һоқуқи болған идийә-пикир әркинлики, сөзләш әркинлики, интернет әркинлики қатарлиқ һоқуқлириниң уйғур елида қаттиқ дәпсәндә қилиниватқанлиқиниң мисали, дәп көрсәтти.

Хитай һөкүмити йеқинқи йиллардин буян "җуңхуа хәлқ җумһурийитиниң террорлуққа қарши туруш қануни", "тор бихәтәрлики қануни", "алақә торлири учур мулазимитини башқуруш чариси" вә "шинҗаң уйғур аптоном райониниң торда ялған учур тарқитишниң алдини елиш вә уни җазалаш низами" қатарлиқ бир қатар йеңи қанун-низамларни бәлгиләш арқилиқ уйғурларниң пикир вә учур әркинликлирини қаттиқ қамал қиливатқанлиқи мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт