Uyghur élida yene 9 kishi “Torda qanun'gha xilap uchurlarni tarqitish jinayiti” bilen bir terep qilin'ghan
Uyghur aptonom rayonluq da'iriler “Intérnét torida qanun'gha xilap uchurlarni tarqitish jinayiti” bilen yene 9 déloni bir terep qilghan.
“Xelq géziti” ning bu heqtiki xewiridin melum bolushiche, bu qétim bir terep qilin'ghan 9 délo mushu xilda bir terep qilin'ghan on ikkinchi türkümdiki délolar iken. Xewerde mezkur délolargha chétishliq kishilerning “Alaqe tori qatarliq supilardin paydilinip, zorawanliq-térrorluq, diniy esebiylik, milliy bölgünchilik, pitne-ighwa we yalghan uchur qatarliq mezmunlargha chétilidighan yazmilar, süretler we ün-sinlarni saqlap tarqatqanliqi” ilgiri sürülgen.
Xewerde mezkur 9 délogha chétilip bir terep qilin'ghan kishilerning 5 nepiri Uyghur, 1 nepiri özbék, 3 nepiri xitay iken. Uyghur we özbék tor qollan'ghuchilirining hemmisi diniy matériyallarni, zorawanliq we térrorluqqa a'it mezmunlarni körüsh we yaki saqlash qatarliq jinayetler bilen eyiblen'gen. 3 Neper xitay bolsa ündidar épide siyasiy jehettiki pitne-ighwalarni tarqitish, qanunsiz yighilish teshkillesh dégen jinayetler bilen eyiblen'gen. Halbuki, 3 neper xitay peqet memuriy jehettin toxtitip qoyush jazasi bérilgen bolsa, qalghanlarning hemmisige jinayi ishlar qanuni boyiche toxtitip qoyush jazasi bérilgen.
Chet'ellerdiki Uyghur közetküchiler bu heqte pikir bayan qilip, yuqiriqi ehwallarni kishilerning eng négizlik hoquqi bolghan idiye-pikir erkinliki, sözlesh erkinliki, intérnét erkinliki qatarliq hoquqlirining Uyghur élida qattiq depsende qiliniwatqanliqining misali, dep körsetti.
Xitay hökümiti yéqinqi yillardin buyan “Jungxu'a xelq jumhuriyitining térrorluqqa qarshi turush qanuni”, “Tor bixeterliki qanuni”, “Alaqe torliri uchur mulazimitini bashqurush charisi” we “Shinjang Uyghur aptonom rayonining torda yalghan uchur tarqitishning aldini élish we uni jazalash nizami” qatarliq bir qatar yéngi qanun-nizamlarni belgilesh arqiliq Uyghurlarning pikir we uchur erkinliklirini qattiq qamal qiliwatqanliqi melum.
- Nuri türkel: “Méning komissarliq xizmitim bolsun we yaki hazirqi re'islik xizmitim bolsun hemmisi asasliq Uyghurlarning xizmitini qilishni merkez qilghan”
- Bextiyar böre: “Men Uyghur, men térrorchi emes, irqiy qirghinchiliqni toxtat”
- Amérika Uyghur akadémiyesining 3-nöwetlik saylimida aldinqi xizmetler xulasilinip yéngi pilanlar otturigha qoyuldi
- Dunya musapirlar künide Uyghur musapirlirini kanadagha yerleshtürüsh heqqide teklip layihesi sunuldi
- Doktor adriyan zénz gérmaniyediki Uyghur jama'iti teripidin qizghin alqishlandi
