Уйғур елида йәнә бир уйғур әмәлдар "идийә җәһәттин партийигә кирмигән" дәп җазаланған

Мухбиримиз ирадә
2021-02-25
Share

Хитайчә "тәңритағ" ториниң хәвиридин қариғанда, хитай даирилири мәмтимин абдулла исимлик йәнә бир уйғур кадирни "партийә интизамиға вә қанунға еғир хилаплиқ қилиш" билән әйибләп, вәзиписидин қалдурған вә дело турғузуп тәптиш органлириға тапшуруп бәргән.

Мәлум болушичә, мәмтин абдулла аталмиш "ғәрбий тәңритағ дөләт игидарчилиқидики орман башқуруш идариси" ниң мудири вә муавин партком секритари икән.

Шинҗаң уйғур аптоном районлуқ интизам тәкшүрүш вә назарәт қилиш комитети мәмтимин абдулла һәққидики әйибнамисида уни ". . . Пара қобул қилиш, мәркәзниң роһи вә интизамға хилаплиқ қилиш, совғат қобул қилиш, әхлақ җәһәттә чириклишиш, һөкүмәт мәблиғигә хиянәт қилиш" дегәндәк хитай компартийәсиниң әмәлдарларни әйибләштики бир қатар қелиплашқан әйибләр билән әйиблигән.

Бирақ әйибнамидә мәмтимин абдулла һәққидә диққәт қозғайдиған төвәндики ибариләрму ишлитилгән: ". . . Мәмтимин абдулла бир партийә әзаси болсиму, бирақ у әзәлдин идийә җәһәттин партийигә кирмигән, тәшкилниң тәкшүрүшигә қаршилиқ қилип, һуҗум вә мудапиә иттипақи қурған. Мәркәз роһи вә сиясий интизамға, тәшкилий интизамға хилаплиқ қилған. . ."

Хитай һөкүмити 2017-йили уйғур елида кәң көләмлик тутқун һәрикитини йолға қойғандин кейин, асасий қатламларда хизмәт қиливатқан уйғур әмәлдарлириғиму кәң көләмдә тазилаш елип барған иди. Бир тәрәп қилинған уйғур әмәлдарларниң көпинчисиниң җинайитиниң немә икәнлики ениқ болмаслиқ билән биргә, униң сиясий мәвқәгә берип тутушидиғанлиқи пәрәз қилинмақта.

Хәвәрдин қариғанда, мәмтимин абдулла 1967-йили чира наһийәсидә дуняға кәлгән болуп, у илгири қарақаш наһийә деһқанчилиқ техникисини кеңәйтиш мәркизиниң мудири, хотән шәһириниң муавин шәһәр башлиқи, хотән шәһәрлик партком даимий комитетиниң әзаси, қарақаш наһийәсиниң муавин секретари вә һакими қатарлиқ вәзипиләрни өтигәндин кейин, 2016-йили 1-айдин итибарән шинҗаң ғәрбий тәңритағ дөләт игидарчилиқидики орман башқуруш идариси партийә комитетиниң муавин секретари вә мудирлиқ вәзиписигә йөткәлгән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт