Uyghur élida yene bir Uyghur emeldar "Idiye jehettin partiyige kirmigen" dep jazalan'ghan

Muxbirimiz irade
2021-02-25
Share

Xitayche "Tengritagh" torining xewiridin qarighanda, xitay da'iriliri memtimin abdulla isimlik yene bir Uyghur kadirni "Partiye intizamigha we qanun'gha éghir xilapliq qilish" bilen eyiblep, wezipisidin qaldurghan we délo turghuzup teptish organlirigha tapshurup bergen.

Melum bolushiche, memtin abdulla atalmish "Gherbiy tengritagh dölet igidarchiliqidiki orman bashqurush idarisi" ning mudiri we mu'awin partkom sékritari iken.

Shinjang Uyghur aptonom rayonluq intizam tekshürüsh we nazaret qilish komitéti memtimin abdulla heqqidiki eyibnamisida uni ". . . Para qobul qilish, merkezning rohi we intizamgha xilapliq qilish, sowghat qobul qilish, exlaq jehette chiriklishish, hökümet meblighige xiyanet qilish" dégendek xitay kompartiyesining emeldarlarni eyibleshtiki bir qatar qéliplashqan eyibler bilen eyibligen.

Biraq eyibnamide memtimin abdulla heqqide diqqet qozghaydighan töwendiki ibarilermu ishlitilgen: ". . . Memtimin abdulla bir partiye ezasi bolsimu, biraq u ezeldin idiye jehettin partiyige kirmigen, teshkilning tekshürüshige qarshiliq qilip, hujum we mudapi'e ittipaqi qurghan. Merkez rohi we siyasiy intizamgha, teshkiliy intizamgha xilapliq qilghan. . ."

Xitay hökümiti 2017-yili Uyghur élida keng kölemlik tutqun herikitini yolgha qoyghandin kéyin, asasiy qatlamlarda xizmet qiliwatqan Uyghur emeldarlirighimu keng kölemde tazilash élip barghan idi. Bir terep qilin'ghan Uyghur emeldarlarning köpinchisining jinayitining néme ikenliki éniq bolmasliq bilen birge, uning siyasiy mewqege bérip tutushidighanliqi perez qilinmaqta.

Xewerdin qarighanda, memtimin abdulla 1967-yili chira nahiyeside dunyagha kelgen bolup, u ilgiri qaraqash nahiye déhqanchiliq téxnikisini kéngeytish merkizining mudiri, xoten shehirining mu'awin sheher bashliqi, xoten sheherlik partkom da'imiy komitétining ezasi, qaraqash nahiyesining mu'awin sékrétari we hakimi qatarliq wezipilerni ötigendin kéyin, 2016-yili 1-aydin itibaren shinjang gherbiy tengritagh dölet igidarchiliqidiki orman bashqurush idarisi partiye komitétining mu'awin sékrétari we mudirliq wezipisige yötkelgen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet