Xitay Uyghur élining asasiy qatlamlardiki partiye-hökümet kadirlirini közitishni kücheytken

Muxbirimiz gülchéhre
2018-05-16
Élxet
Pikir
Share
Print

"Xitay xelq tori" Uyghurche qanilining xewiridin ashkarilinishiche, Uyghur aptonom rayonluq partkom, yéqinda ewetken partkomning 4-türkümdiki közitish guruppiliri asasiy qatlamlargha orunliship bolghan.

Aptonom rayonluq partkomning ewetken 13 közitish guruppisining bu qétimliq közitish xizmitining mudditi ikki ay etrapida bolup, közitish guruppiliri bu mezgilde, asasliq közitilidighan partiye teshkilatlirining rehberliki we ezaliri üstidiki inkaslirini qobul qilish üchün mexsus alaqilishish téléfoni, éléktronluq xet sanduqi qatarliqlarni tesis qilghan.

Közitish guruppiliri nuqtiliq halda siyasiy intizam, bölgünchilikke qarshi turush kürishi intizami, teshkiliy intizam, pakliq intizami, ammiwi intizam, xizmet intizami we turmush intizamini ijra qilishi qatarliq jehetlerdiki ehwallarni közitidiken we inkaslarni qobul qilidiken shuningdek körülgen mesililerni alaqidar orun we tarmaqlarning bir terep qilishigha tapshurup béridiken.

Xewerde gerche bu nöwet xitay hökümitining asasiy qatlamgha ewetken 13 közitish guruppisidiki adem sani tilgha élinmighan bolsimu, emma ularning ayrim-ayrim qaraqash nahiyesi qatarliq on nahiye we aptonom rayonluq medeniyet nazariti qatarliq toqquz tarmaqning partiyeguruppiliri gha qarita "Qaytidin qarap chiqish" xizmiti élip baridighanliqi ilgiri sürülgen.

Xitay da'irilirining aldinqi bir qanche qétimliq ewetken partiye hökümet kadirlirini közitish guruppilirining xizmiti, her qaysi sahelerdiki ikki yüzlimichi kadirlarni bayqap pash qilish bolghan we bu jeryanda, nurghun Uyghur kadirlar xitayning siyasetlirini emillileshtürüshte yumshaq qolluq qilghanliqi seweblikmu jazalan'ghan idi.

Xitay da'iriliri asasiy qatlamgha ewetilgen bu közitish gurupilirining wezipisining yaxshi nazaretchi bolup, diqqetni muqimliqni qoghdashqa merkezleshtüridighanliqi, xitay merkizi hökümitining türlük siyasetlirining hemme yerni toluq qaplishigha, kem -kütisiz emeliylishishige kapaletlik qilidighanliqini teshwiq qilghan.

Xitay da'irilirining ötken yildin bashlap Uyghur aptonom rayonida muqimliqni ishqa ashurushta eng "Chong tosalghu", "Eng xeterlik düshmen", kadirlar qoshunigha yoshurunuwalghan "Ikki yüzlimichi" ler dep körsitip, her qaysi saheler boyiche keng da'iride "Ikki yüzlimichi" lerni tartip chiqirip, we tazilap, ijtima'iy muqimliqni qoghdash nishanigha yétishni kapaletke ige qilmaqchi bolghan idi. Bu jeryanda bir qisim her derijilik Uyghur kadirlar, ziyaliylar tutqun qilin'ghan we jazalan'ghan idi.

Közetküchiler bolsa xitay hökümitining bu qétim asasiy qatlam kadirliri üstidiki közitish we nazaret qilish sistémisini yenimu kücheytishini, asasiy qatlamdiki Uyghur kadirlar üstidin yene bir qétimliq idiyewi tekshürüsh élip baridighanliqining béshariti dep perez qilmaqta.

Toluq bet