Хитайниң пахта тоқумичилиқ карханилирини уйғур районида давамлиқ кеңәйтиватқанлиқи мәлум болди

Мухбиримиз әркин
2020-06-01
Елхәт
Пикир
Share
Принт

Уйғурларни мәҗбури әмгәккә селип, хәлқара әһдинамиләргә хилаплиқ қилиш билән әйиблиниватқан хитай пахта тоқумичилиқ карханилириниң уйғур аптоном районида давамлиқ кеңийиватқанлиқи мәлум болди. Хитай таратқулириниң ашкарилишичә, йеқинда ақсуниң шаяр наһийәсини 300 миң урчуқлуқ бир пахта тоқумичилиқ завути қурулуш башлиған. Әгәр бу завут пүтүп ишқа киришсә, униңда 1500 миң адәм ишләйдикән. Бу завут, уйғурлар мәҗбурий вә әрзан әмгәккә селинип, хитай пахта тоқумичилиқ карханилириниң асаслиқ әмгәк күчи мәнбәсигә айланған, бу карханиларға қарита ембарго йүргүзүш тәләп қилиниватқан шундақла америка бәзи карханиларға ембарго қойған мәзгилдә қурулуш башлиғаниди.

«Ақсу гезити» ниң хәвәр қилишичә, шаяр наһийәсидә қурулуватқан 300 миң урчуқлуқ бу завутқа корлани база қилған «шинҗаң лихуа тоқумичилиқ чәклик ширкити» мәбләғ салғаникән. Хәвәрдә, 25-май күни қурулуш башланған бу завутқа бир милярд 320 милйон йүән мәбләғ селиш пиланланғанлиқи илгири сүрүлгән.

Хәвәрдә қәйт қилинишичә, әгәр бу қурулуш пүтсә мәзкур ширкәтниң егириш көлими 860 миң урчуққа, ишләйдиған адәм сани 3 миң 500 дин көпрәккә йетип, бу наһийәдики «башламчи кархани» ға айлинидикән. Лекин кишилик һоқуқ тәшкилатлириниң илгири сүрүшичә, хитай һөкүмити атақта уйғурларни «ишқа орунлаштуруп, намратлиқтин қутқузуш» ни тәкитлисиму, лекин бу карханилар уйғурларни екиспилататсийә қилипла қалмай, хитай һөкүмитиниң уларни контрол қилиши, мәдәнийити, диний етиқади вә тилини чәкләп, ассимилятсийә қилишиға ярдәмләшмәктикән.

Пикирләр (0)
Share
Толуқ бәт