“кәспий тәрбийәләш мәктәплири” гә давамлиқ оқутқучи қобул қилинмақта
2019.04.17
Уйғурлар дияриниң һәрқайси җайлирида көпләп қурулуватқан “кәспий тәрбийәләш мәктипи” намидики муәссәсәләрниң давамлиқ кеңийиватқанлиқи мәлум. Йеқинда турпан кәспий тәрбийәләш мәктипи чиқарған оқутқучи қобул қилиш һәққидики елан бу нуқтини йәнә бир қетим көрсәтти.
“турпан һөкүмәт тори” ниң 14-апрелдики хәвиридә ейтилишичә, турпан кәспий тәрбийәләш мәктипи җәмийәттин 270 нәпәр оқутқучи қобул қилиш һәққидә елан чиқарған. Еланда қобул қилинидиғанларниң сиясий җәһәттә “вәтәнниң бирликини қоғдайдиған, миллий бөлгүнчиликкә қарши мәйдани ениқ болған” болуши алаһидә тәкитләнгән.
Бир нәччә йилдин бери үзлүксиз тилға елинип кәлгән лагерлар мәсилиси һәққидә хитай һөкүмити изчил инкар позитсийәсидә болуп кәлгән болуп, хәлқараниң көплигән маддий пакитларни оттуриға қоюши билән ахири бу җайларни “лагер әмәс, бәлки кәспий тәрбийәләш мәркизи” дәп изаһлиған иди.
Анализчилар бу һәқтә пикир қилип, “һечқандақ бир мәктәп икки-үч йүз оқутқучини бирақла хизмәткә қобул қилмайду. Бундақ зор сандики оқутқучилар қошуниниң тәңла хизмәткә қобул қилиниши бу аталмиш мәктәпниң дәл лагерға айлинип болғанлиқини көрситиду,” деди.