Mutexessisler Uyghur élidiki "Yighiwélish lagérliri" gha qamalghanlarning 1.1 Milyon'gha yéqinlishidighanliqini bildürdi

Muxbirimiz erkin
2018-06-14
Share

Chet'ellik mutexessisler xitayning Uyghur élidiki "Yighiwélish lagérliri" gha qamalghanlarning bir milyon 100 minggha yéqinlishidighanliqini, bu sanning rayondiki quramigha yetken musulmanlar nopusining 10 pirsenti yaki 11 pirsentini teshkil qilidighanliqini bildürdi.

Xitay hökümiti hazirgha qeder "Yighiwélish lagérliri" ning mewjutluqi we uningdiki tutqunlarning konkrét sani heqqide héchqandaq melumat élan qilip baqmidi. Shu sewebtin bu lagérlardiki tutqunlarning sani heqqide her xil perezler otturigha qoyulup keldi. Kishilik hoquqni közitish teshkilati bu lagérlarda 800 mingdek kishining tutup turuluwatqan bolushi mumkinlikini ilgiri sürgen idi.

Halbuki, "Albawaba" namliq bir ottura-sherq torining 13‏-iyun küni ilgiri sürüshiche, gérmaniyelik mutexessis, yawropa medeniyet we téxnologiye institutining léktori adré'an zénz Uyghur diyaridiki "Yighiwélish lagérliri" gha qamalghan tutqunlarning bir milyon 100 minggha yéqinlishidighanliqini bildürgen.

Adréan zénz yéqinda amérikining stratford tetqiqat ornining torida Uyghur aptonom rayonidiki lagérlar heqqide doklat élan qilip, xelq'ara axbarat wasitilirining diqqitini qozghighan idi. U "Albawaba" torining ziyaritini qobul qilghanda özining érishken mexpiy höjjetlirige asasen yuqiriqi xulasini chiqarghanliqini bildürgen.

U mundaq dégen: "Eger bu höjjetler toghra bolsa biz shuni qiyas qilalaymizki, shinjangda tutqun qilin'ghan kishiler bir milyon 100 minggha yéqinlishidu. Bu mezkur rayondiki quramigha yetken musulmanlar nopusining 10 yaki 11 pirsentini teshkil qilidu".

"Albawaba" torining xewiride yene xitayning rayonda ilghar közitish apparatlirini orunlashturup, kishilerni qattiq teqib astigha alghanliqini, xitayning bu xil teqiblesh sistémisini bashqa döletlerge éksport qiliwatqanliqini, uni sétiwélishqa qurbi yetmeydighan döletlerge xitayning qerz bérip turup sétiwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.