Lagérlarning kéngiyidighanliqi "Nishanliq yardem bérish" muhakime yighinida otturigha qoyuldi

Muxbirimiz eziz
2020-09-29
Share

Xitay hökümitining adem küchi bayliqi we ijtima'iy kapalet ministirliqi 28-séntebir küni qeshqerde "Jenubiy shinjanggha nishanliq yardem bérish" témisida yighin achqan bolup, yighinda 3-qétimliq "Shinjang xizmet yighini" ning rohini öginish we ijra qilish, shu qatarda "Jenubiy shinjangning ixtisasliqlar sépini kéngeytish" tekitlen'gen.

Mezkur ministirliqning ministiri jang jinen bu heqte söz qilip "Shi jinpingning yéngi dewrdiki shinjangni idare qilish istratégiyesini toluq we qet'iy ijra qilish" ni tekitligen. Shuningdek "Biz choquq ixtisasliq kishilerni terbiyelesh arqiliq jenubiy shinjangdiki namratliq we ishqa orunlashturush xizmitini yükseldürüshimiz kérek" dégen. Axirida bolsa "Terbiyelesh" bilen ishqa orunlashturushni zich birleshtürüsh, bu jehette xitay ölkiliri tégishlik "Yardem" de bolush lazimliqini bildürgen.

Yighinda Uyghur aptonom rayonining re'isi shöhret zakirmu söz qilip xitay ölkilirining bu xildiki "Nishanliq yardem" lirining muqimliq we ijtima'iy tereqqiyatqa paydiliq ikenlikini, shuning üchün bu qararni toluq ijra qilish lazimliqini tekitligen.

Emma bir qisim analizchilar xitay hökümitining ötken mezgillerde izchil dawam qiliwatqan hemde barghanséri kéngiyiwatqanliqi melum boluwatqan lagérlarni "Terbiyelesh" namida aqlap kelgenlikini, shundaqla "Terbiyelesh" namida kéngiyiwatqan bu lagérlarning xelq'arada keskin tenqidliniwatqan "Mejburiy emgek" üchün emgek küchlirini teyyarlaydighan meydan boluwatqanliqini eskertti. Shuningdek xitay hökümitining nöwettiki "Nishanliq yardem bérish" qurulushini "Terbiyelesh we ishqa orunlashturush" bilen baghlap ijra qilish ehwaligha qarap buning nöwettiki lagérlarni téximu kéngeytishning béshariti ikenlikini algha sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.