Йәкән наһийәсиниң сабиқ партком секретари ваң йоңҗи лагердики 7 миң уйғурни қоюп бәргәнлики сәвәблик вәзиписидин елип ташланған

Мухбиримиз әркин
2019-11-18
Елхәт
Пикир
Share
Принт

Уйғур аптоном районлуқ интизам тәкшүрүш вә ревизийә комитети 2018‏-йили 3‏-айда йәкән наһийәсиниң сабиқ партком секретари ваң йоңҗиниң чериклик, парихорлуқ вә сиясий интизамға хилаплиқ қилиш түпәйли вәзиписидин елип ташлинип, әдлийә тармақлириниң бир тәрәп қилишиға тапшуруп берилгәнликини елан қилғаниди. Лекин «ню-йорк вақти гезити» 16‏-ноябир күни елан қилған хитайниң уйғурларни кәң көләмлик тутқун қилип, лагерларға қамаш тоғрисидики мәхпий һөҗҗитидә ваң йоңҗиниң вәзиписидин елип ташлинишидики һәқиқий сәвәб ашкариланған.

Һөҗҗәттин ашкарилинишичә, ваң йоңҗи дәсләпки вақитларда ши җинпиң вә чен чүәнголарниң уйғурларни омумйүзлүк бастуруш, «қәтий рәһим шәпқәт қилмаслиқ» тоғрисидики буйруқини қаттиқ иҗра қилған.

У йәкән наһийәсидә кәң көләмлик тутқун елип берип, 20 миң кишилик лагер салдурған. Лекин ваң йоңҗи узун өтмәй бундақ кәң көләмлик тутқунниң тоғра әмәслики, бу сиясәт йәкән наһийәсиниң иқтисадиға зиянлиқ болупла қалмай, униң уйғурлар билән хитайлар оттурисида узун йиллиқ «ирқий өчмәнлик» кә йол ачидиғанлиқини һес қилишқа башлиған. «Ню-йорк вақти гезити» ниң хәвиридә, шу сәвәблик униң лагердики 7000 уйғурни қоюп бәргәнлики, шундақла өзиниң бу сиясәткә болған наразилиқини һәр хил шәкилләрдә ипадилигәнлики тәкитләнгәниди.

Ваң йоңҗи 2018‏-‏йили 3‏-айда вәзиписидин елип ташланғанда радийомиз униң һәққидә хәвәр бәргән. Даириләр әйни вақитта ваң йоңҗини «икки йүзлимичилик» билән әйибләп, униң «мәркәзниң шинҗаңни идарә қилиш тоғрисидики истиратегийәсигә көрүнүштә итаәт қилип; астиртин хилаплиқ қилғанлиқи» ни илгири сүргән. Лекин лагердики 7 миң тутқунни қоюп бәргәнликини тилға алмиғаниди. Ваң йоңҗи әсли гәнсулуқ болуп, узун йил қәшқәрдә хизмәт қилған.

У илгири қәшқәр йеза игилик машинисазлиқ техникоми, «шинҗаң йеза игилик институти» ни оқуп, йопурға, пәйзиват, йәкән, қәшқәр қатарлиқ шәһәр вә наһийәләрдә вәзипә өтигән. У, 2014‏-йили 7‏-айда йәкән наһийәсидә йүз бәргән «елишқу вәқәсидин кейин йәкән наһийәсиниң партком секретарлиқиға йөткәп келингәниди.

Хитай даирилири өткән йили униң әдлийә тармақлириға тапшуруп берилгәнликини елан қилғаниди. Нөвәттә, униң тәқдириниң қандақ болғанлиқи мәлум әмәс.

Пикирләр (0)
Share
Толуқ бәт