Edebiyat derslikidiki Uyghur yazghuchilirining eserliri xitay yazghuchilirining terjime eserlirige amashturulghanliqi naraziliq qozghidi

Muxbirimiz méhriban
2016-03-15
Élxet
Pikir
Share
Print

Xitay da'irilirining 2000-yillarning béshida, bolupmu 2009-yildiki 5-iyul ürümchi weqesidin kéyin,"Qosh til ma'aripi" namida xitay tili ma'aripini omumlashturup, eslidiki Uyghur mekteplirini qisqartip, Uyghur tilidiki derslerni azaytishi Uyghurlar arisida naraziliq qozghighan idi.

Melum bolushiche, yéqinda da'irilerning edebiyat derslikigimu qaytidin özgertish kirgüzüp, dersliktiki Uyghur klassikliri we Uyghur yazghuchilirining eserlirining ornigha xitay klassikliri we xitay yazghuchilirining terjime eserlirini kirgüzüshi Uyghurlar arisida yene bir qétimliq naraziliqqa seweb bolghan,

Ündidar torida 12-mart élan qilin'ghan "Biz özimizning Uyghur edebiyatini telep qilimiz" serlewhilik maqalide kona edebiyat derslik kitabining munderijisi bilen yéngidin tüzülgen edebiyat dersliki munderijisining foto kopiyisi bérilip, yéngi derslikte chiqiriwétilgen Uyghur klassikliri we hazirqi zaman Uyghur edebiyatida tonulghan yazghuchi, ediblerning eserliri eynen körsitilip, hökümet da'iriliridin Uyghur ewladlirining ana tilida yézilghan edebiyat nemuniliri bilen tonushush hoquqini tartiwalmasliq telep qilin'ghan.

Malala texellusluq tordash teripidin xitay tilida yézilghan maqalide hökümet da'irilirige muraji'et qilip: "Hazir Uyghur oqughuchilar bir künde aran bir sa'etla ana til dersidin sawat alidu. Mushundaq shara'itta Uyghur edebiyat derslikidin Uyghur klassikliri we hazirqi zamanda tonulghan Uyghur yazghuchi, ediblirining eserliri chiqiriwétilse, u halda bizning ewladlirimiz Uyghur edebiyati, Uyghur shé'iriyiti, Uyghur örp-aditi, Uyghur epsane-riwayet, tarixliridin sawatsiz qalmamdu?! hazirqi shara'itta ewladlirimiz xenzuche dersliktin qérindash milletler edebiyatini, xenzu yazghuchilirining esli eserlirini ögense bolidighu?! chünki hökümitimiz bu shara'itni hazirlidi, eslidila intayin az bolghan ana tili edebiyat derslikide Uyghur tilidiki nemuniler azaytiwétilse 50 yildin kéyin, 100 yildin kéyinki Uyghur ewladliri qandaq aqiwetke qalidu?" dégen bayanlar bérilgen.

Toluq bet