Uyghur diyarida maska taqimay talagha chiqish cheklensimu, lékin soda we sayahet teshwiq qilinmaqta

Muxbirimiz erkin
2020-03-30
Élxet
Pikir
Share
Print

Uyghur diyarida puqralarning maska taqimay talagha chiqishi cheklensimu, lékin da'iriler soda we sayahetning eslige kelgenlikini keng kölemde teshwiq qilmaqta.

Xitay da'iriliri ötken hepte rayonda kinoxanilarning échilghanliqini élan qilghan. Mutexessisler buning "Zor tewekkülchilik" ikenlikini tekitligen idi. Lékin bu hepte da'iriler rayonda soda nuqtilirining échilip, sayahetning eslige kelgenliki, sayahet nuqtilirining qayta "Qaynam-tashqinliqqa chömgenliki" ni ilgiri sürdi. Shinxu'a agéntliqining qeyt qilishiche, nöwette sayahetchilerning muhim soda qilish nuqtilirining biri bolghan ürümchi döngköwrüktiki chong bazar sayahetchilerge échiwétilip, "Neghme-nawa" we qayta "Qaynam-tashqinliqqa chömgen."

Lékin maska taqap, "Neghme-nawa" qiliwatqan puqralarning qanchisining sayahetchi, qanchisining hökümet orunlashturghan "Neghme-nawachilar" ikenliki melum emes. Oxshash bir waqitta her qaysi nahiyelerde yerlik da'iriler puqralarni chéchek bayramlirigha teshkillep, wirusning kontrol qilin'ghanliqi, sayahetning eslige kelgenlikini namayan qilishqa tirishmaqtiken.

Bügür nahiyeside ötküzülgen "Örük chéchiki" bayrimi ene shundaq pa'aliyetlerning biri. Xitaydiki "Junggo xewerliri" torining xewer qilishiche, chéchek bayrimi bügürdiki 6000 moluq bir örüklük baghda ötküzülgen bolup, uninggha idare-jem'iyetler seperwer qilin'ghanliqi melum.

Közetküchilerning ilgiri sürüshiche, yerlik da'iriler korona wirusining kontrol qilinip, rayonda weziyetning normal ehwalgha qaytqanliqini namayan qilishqa tirishsimu, lékin kishilerni siyasiy weziyet hem korona wirusining wehimisi chulghiwalghanliqi körünüp turidiken. Shinxu'a agéntliqining xewiride rayonda kishilerning maska taqap yürüshi, ammiwi sorunlarda beden températurisini tekshürüshning yenila yolgha qoyuluwatqanliqi, kishilerning bir-biri bilen alaqe qilghanda yérim métir ariliq saqlishi telep qilinidighanliqi ilgiri sürülgen.

Toluq bet