Уйғур аптоном райониниң муһит мәсилиси йәнила еғир әһвалда икән

Мухбиримиз әркин
2018-04-09
Елхәт
Пикир
Share
Принт

Уйғур аптоном райониниң муһит мәсилисиниң йәнила еғир әһвалда икәнлики, су вә һаваниң давамлиқ булғиниши қатарлиқ мәсилиләргә дуч келиватқанлиқи билдүрүлди.

«Йәршари вақти гезити» ниң хәвәр қилишичә, үрүмчи қатарлиқ шәһәрләрниң һава сүпити йеқинқи 5 йилдин бери изчил начарлишип маңған.

Бу әһвал йәрлик даириләрни бәзи тәдбирләрни қоллинишқа мәҗбур болған. «Йәр шари вақти гезити» ниң хәвәр қилишичә, уйғур аптоном районлуқ муһит қоғдаш идариси йеқинда муһит қоғдашниң йеңи бәлгилимисини елан қилип, минерал маддилар, рәңлик метал, батарейә қатарлиқ мәһсулатларни ишләпчиқиридиған карханиларниң керәксиз маддиларни қоюп беришигә йеңи өлчәм бекиткән.

Уйғур аптоном районлуқ муһит қоғдаш идариси йәкән, пичан қатарлиқ наһийәләрдики рәңлик метал, минерал вә батарейә ширкәтлиригә йеңи өлчәмниң иҗра қилинидиғанлиқини билдүргән. Хәвәрдә көрситилишичә, лекин бу өлчәм қурулуш басқучидики түрләргә яки тәстиқланған қурулуш түрлиригә 2019‏-йили 1‏-апрелдин башлап иҗра қилинидикән.

Хитай даирилириниң муһитни булғайдиған карханиларни уйғур райониға кәң көләмлик йөткәп чиқиши уйғур райониниң муһитиниң булғинишини тезләткән.

Хитай муһит тармақлириниң өткән йили елан қилған доклатида, хитайдики һаваси әң булғанған 10 шәһәрниң 5 иниң уйғур аптоном районида икәнликини елан қилған иди.

Йәрлик даириләр йеқинқи 1-2 йилдин бери тарим, көнчи дәрялириниң сүйини әслигә кәлтүрүш, тоғрақлиқларни қоғдаш, улунгүр, бағраш көллирини қоғдаш, дәря еқинлирида белиқ тутушни пәсиллик чәкләш дегәндәк бәзи тәдбирләрни алған.

Көнчи дәрясини сүйини көпәйтип, униң төвәнки еқинидики тоғрақлиқларни қоғдаш шу хил муһит қурулушлириниң бири болуп, мәзкур қурулуш йеқинда башланған. Бу йилқи пиланда көнчи дәрясиниң оттура вә төвән еқининиң су миқдарини 200 милйон куп метирға йәткүзүш икән. Лекин муһит қоғдиғучилар бу тәдбирләрниң үнүмигә гуман билән қарап кәлди. Уларниң қаришичә, муһитни яхшилашниң әң үнүмлүк чариси көчмәнләрни тизгинләп, завут-карханиларни контрол қилиш икән.

Пикирләр (0)
Share
Толуқ бәт