Uyghur aptonom rayonining muhit mesilisi yenila éghir ehwalda iken

Muxbirimiz erkin
2018-04-09
Élxet
Pikir
Share
Print

Uyghur aptonom rayonining muhit mesilisining yenila éghir ehwalda ikenliki, su we hawaning dawamliq bulghinishi qatarliq mesililerge duch kéliwatqanliqi bildürüldi.

"Yershari waqti géziti" ning xewer qilishiche, ürümchi qatarliq sheherlerning hawa süpiti yéqinqi 5 yildin béri izchil nacharliship mangghan.

Bu ehwal yerlik da'irilerni bezi tedbirlerni qollinishqa mejbur bolghan. "Yer shari waqti géziti" ning xewer qilishiche, Uyghur aptonom rayonluq muhit qoghdash idarisi yéqinda muhit qoghdashning yéngi belgilimisini élan qilip, minéral maddilar, renglik métal, bataréye qatarliq mehsulatlarni ishlepchiqiridighan karxanilarning kéreksiz maddilarni qoyup bérishige yéngi ölchem békitken.

Uyghur aptonom rayonluq muhit qoghdash idarisi yeken, pichan qatarliq nahiyelerdiki renglik métal, minéral we bataréye shirketlirige yéngi ölchemning ijra qilinidighanliqini bildürgen. Xewerde körsitilishiche, lékin bu ölchem qurulush basquchidiki türlerge yaki testiqlan'ghan qurulush türlirige 2019‏-yili 1‏-apréldin bashlap ijra qilinidiken.

Xitay da'irilirining muhitni bulghaydighan karxanilarni Uyghur rayonigha keng kölemlik yötkep chiqishi Uyghur rayonining muhitining bulghinishini tézletken.

Xitay muhit tarmaqlirining ötken yili élan qilghan doklatida, xitaydiki hawasi eng bulghan'ghan 10 sheherning 5 ining Uyghur aptonom rayonida ikenlikini élan qilghan idi.

Yerlik da'iriler yéqinqi 1-2 yildin béri tarim, könchi deryalirining süyini eslige keltürüsh, toghraqliqlarni qoghdash, ulun'gür, baghrash köllirini qoghdash, derya éqinlirida béliq tutushni pesillik cheklesh dégendek bezi tedbirlerni alghan.

Könchi deryasini süyini köpeytip, uning töwenki éqinidiki toghraqliqlarni qoghdash shu xil muhit qurulushlirining biri bolup, mezkur qurulush yéqinda bashlan'ghan. Bu yilqi pilanda könchi deryasining ottura we töwen éqinining su miqdarini 200 milyon kup métirgha yetküzüsh iken. Lékin muhit qoghdighuchilar bu tedbirlerning ünümige guman bilen qarap keldi. Ularning qarishiche, muhitni yaxshilashning eng ünümlük charisi köchmenlerni tizginlep, zawut-karxanilarni kontrol qilish iken.

Toluq bet