Uyghur diyaridiki muxbirlarning teqib nishani boluwatqanliqi tenqidlendi

Muxbirimiz eziz
2019-01-29
Élxet
Pikir
Share
Print

"Xitaydiki chet'el muxbirliri kulubi" 29-yanwar küni mezkur kulubqa eza chet'el muxbirlirining xitaydiki 2018-yilliq pa'aliyet ehwali toghrisida yilliq doklat élan qildi. Mezkur doklatta "Hökümetning nazariti we biwasite changgal sélishi seweblik muxbirlarning xitaydiki xizmiti izchil tosqunluqqa uchrap keldi. Shinjangdiki muxbirlarning xizmiti eng zor derijide tosalghugha uchridi" dep xulase chiqirilghan.

Mezkur doklatta körsitilishiche, chet'ellik muxbirlar duch kélidighan eng zor tosalghularning biri xitay hökümitining héchnémidin héchnéme yoqla muxbirlargha wiza bérishni ret qilishi yaki muxbirlarning wizisini uzartip bérishni ret qilish ehwali iken. Bu qétim ray sinashqa qatnashqan muxbirlarning 55 pirsenti "Muxbirliq qilish shara'iti barghanséri nacharlap kétiwatidu" dégen. Birmu kishi bu jehettiki ehwalda ilgirikidin yaxshilinish bolghanliqini esliyelmigen.

"Xitaydiki chet'el muxbirliri kulubi" ning re'isi xanna salbérg bu heqte söz qilip, "Keng kölemlik nazaret we xewer menbelirige bolidighan bésim seweblik muxbirlar nishan qilghan jaygha barmay turupla xewer ishleshtin wazkéchishke mejburlanmaqta" dégen. Uyghurlar diyaridiki lagérlar we siyasiy weziyet heqqide xewer ishligen "Bazfid xewerliri" ning byuro mudiri méga rajagopalan, awstraliye radiyo shirkitining muxbiri masyu karnéy qatarliqlar birdek wiza jehette "Jazalan'ghan". Masyo karnéy bu heqte söz qilip "Téléfonumda saqchilarning g-ma'il hésabatimni achqanliqi we bir qisim höjjetlerni yuyuwetkenlikige shahit boldum" dégen.

Mezkur doklatta körsitilishiche, Uyghurlar diyarigha barghan 27 muxbirning 24 nepiri saqchilarning parakendichilikige uchrighan؛ ularning 19 nepirige saqchilar "Kompyutér we sin apparatliridiki matériyallarni öchürüwétish" telipini qoyghan؛ 23 nepirining arqisigha ashkara halda adem chüshken.

Halbuki, xitay tashqi ishlar ministirliqining bayanatchisi géng shu'ang bu heqte muxbirlarning so'aligha jawab bérip "Bu doklat tenqidleshkimu erzimeydu. Chet'el muxbirlirining dölitimizdiki barliq hoquqliri toluq qanuniy kapaletke ige" dégen.

Toluq bet