Xitay da'iriliri ötken hepte yene bir guruppa chet'el muxbirlirini Uyghur rayonida ziyaretke teshkilligen

Muxbirimiz erkin
2019-04-30
Élxet
Pikir
Share
Print

Xelq'ara jem'iyetning yighiwélish lagérlirini taqash heqqidiki küchlük bésimigha duch kéliwatqan xitay hökümiti dawamliq chet'el muxbirlirini Uyghur rayonida ziyaretke teshkillep, xelq'ara bésimni yenggillitishke tirishmaqta.

Xitay taratqulirining xewer qilishiche, da'iriler 21‏-apréldin 29‏-aprélghiche yene bir guruppa chet'ellik muxbirni Uyghur rayonida ziyaretke teshkillep, ürümchi, korla, aqsu, qeshqer qatarliq jaylardiki belgilik orunlarni ziyaret qildurghan. Xitay hökümiti 2 milyondek Uyghur, qazaq we bashqa türkiy musulman xelqler qamalghan yighiwélish lagérlirining "Kespo'iy maharet merkezliri" ikenlikini ilgiri sürüp, xelq'araning diqqitini burashqa tiriship kelmekte.

Shinxu'a torining xewiride ashkarilinishiche, chet'el muxbirlirining bu nöwetlik ziyaret guruppisigha 24 dölettin 39 neper muxbir qatnashqan bolup, da'iriler ularni jéjyang jinshéng guruhining paxta toqumichiliq zawutini, ürümchidiki meschit, muqam ansambili, islam instituti qatarliq jaylarni, aqsu, korla qatarliq jaylarda ékologiyelik baghchilarni, qeshqer kona sheherdiki Uyghur milliy chalghu eswablar ornini, shuningdek qeshqer we atushtiki "Kespiy maharet merkezliri" ni ziyaret qildurghan.

Shinxu'a torining xewiride chet'ellik muxbirlarning bu jaylarni körüp maxtap ketkenliki yézilghan bolsimu, lékin mezkur muxbirlar guruppisining terkibidiki amérika döletlik ammiwi radiyosining muxbiri rob shémitiz 26 ‏-aprél küni bergen xewiride, Uyghur rayonining weziyitining shimaliy koréyedinmu better ikenlikini bildürgen. Uning ilgiri sürüshiche, yerlik da'iriler 25‏-aprél küni muxbirlarni qeshqerdiki atalmish bir "Kespiy maharet merkizi" ni kezdürgen. Uning qeyt qilishiche, bu orundiki kishilerning mutleq köp qismigha bir yildek bolghan bolup, héchkim özlirining qachan qoyup bérilidighanliqini bilmeydiken. Buning aldida muxbirlar guruppisidiki amérika "Blumbérg xewerliri" ning muxbiri 22‏-aprél küni bergen xewiride, "Kespiy maharet merkizi" diki Uyghurlardin so'al soralsa, ularning xuddi yadliwalghandek oxshash sözni tekrarlaydighanliqini bildürgen idi.

Toluq bet