Хитайдин һәйдәлгән мухбир мега раҗагопалан: “шинҗаң һәққидә йезишни давамлаштуримән”

Мухбиримиз шөһрәт һошур
2018.08.22

22‏-Авғуст күнидики хәлқара хәвәрләрдә ню-йоркта чиқидиған “базфид” (Buzzfeed News) хәвәрлири ториниң бейҗиңдики ишханисиниң башлиқи мега раҗагопалан ханимниң хитайдин һәйдәлгәнлики илгири сүрүлди.

Мәлум болушичә бу һәйдилиш хитайниң мега ханнимға сәвәбсиз һалда виза бәрмәслик билән иҗра қилинған.

“хитайда турушлуқ чәтәл мухбирлири кулуби” бүгүн бу һәқтә баянат елан қилип, мега раҗагопаланниң хитайдики 6 йиллиқ мухбирлиқ һаятида ахбаратчилиқ принсиплириға йүксәк дәриҗидә әмәл қилғанлиқини тәкитлигән вә хитай даирилириниң униңға виза бәрмигәнликидин қаттиқ әпсусланғанлиқини билдүргән.

Мега ханим бу йил уйғур аптоном райониниң вәзийити һәққидә язған “сақчи дөлити дегән мушундақ болиду” намлиқ мақалиси хәлқарада күчлүк диққәт тартқан вә мукапатқа еришкән иди. У бүгүн өзиниң хитайдин һәйдилиши үстидә тәсират баян қилип, хитайда мухбирлиқ қилип өткән һаятиниң һәм җапалиқ һәм шәрәплик һаят икәнликини әскәрткән вә буниңдин кейин уйғур вәзийити һәққидә йезиштин тохтимайдиғанлиқини билдүргән.

Хитай ташқи ишлар министирлиқи бүгүн фирансийә ахбарат агентлиқиниң мега раҗагопалан һәққидики соалиға “җуңго һөкүмити чәтәллик мухбирларниң виза ишлирини қанун вә қаидә бойичә беҗириватиду, ” дәп мүҗмәл җаваб бәргән вә соалдин өзини қачурған. Фирансийә агентлиқи өзиниң бүгүнки бу һәқтики хәвиридә хитайниң чишиға тәгкәнлики үчүн хитайдин һәйдәп чиқирилған мухбирниң ялғуз мега раҗагопалан ханим әмәсликини, 2016‏-йили хитайниң “шинҗаң сиясити” ни тәнқид қилған фирансийәлик мухбир урсуланиңму визиси узартип берилмәслик усули билән хитайдин һәйдәлгәнликини әскәртип өткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.