Xitaydin heydelgen muxbir méga rajagopalan: "Shinjang heqqide yézishni dawamlashturimen"

Muxbirimiz shöhret hoshur
2018-08-22
Élxet
Pikir
Share
Print

22‏-Awghust künidiki xelq'ara xewerlerde nyu-yorkta chiqidighan "Bazfid" (Buzzfeed News) xewerliri torining béyjingdiki ishxanisining bashliqi méga rajagopalan xanimning xitaydin heydelgenliki ilgiri sürüldi.

Melum bolushiche bu heydilish xitayning méga xannimgha sewebsiz halda wiza bermeslik bilen ijra qilin'ghan.

"Xitayda turushluq chet'el muxbirliri kulubi" bügün bu heqte bayanat élan qilip, méga rajagopalanning xitaydiki 6 yilliq muxbirliq hayatida axbaratchiliq prinsiplirigha yüksek derijide emel qilghanliqini tekitligen we xitay da'irilirining uninggha wiza bermigenlikidin qattiq epsuslan'ghanliqini bildürgen.

Méga xanim bu yil Uyghur aptonom rayonining weziyiti heqqide yazghan "Saqchi döliti dégen mushundaq bolidu" namliq maqalisi xelq'arada küchlük diqqet tartqan we mukapatqa érishken idi. U bügün özining xitaydin heydilishi üstide tesirat bayan qilip, xitayda muxbirliq qilip ötken hayatining hem japaliq hem shereplik hayat ikenlikini eskertken we buningdin kéyin Uyghur weziyiti heqqide yézishtin toxtimaydighanliqini bildürgen.

Xitay tashqi ishlar ministirliqi bügün firansiye axbarat agéntliqining méga rajagopalan heqqidiki so'aligha "Junggo hökümiti chet'ellik muxbirlarning wiza ishlirini qanun we qa'ide boyiche béjiriwatidu, " dep müjmel jawab bergen we so'aldin özini qachurghan. Firansiye agéntliqi özining bügünki bu heqtiki xewiride xitayning chishigha tegkenliki üchün xitaydin heydep chiqirilghan muxbirning yalghuz méga rajagopalan xanim emeslikini, 2016‏-yili xitayning "Shinjang siyasiti" ni tenqid qilghan firansiyelik muxbir ursulaningmu wizisi uzartip bérilmeslik usuli bilen xitaydin heydelgenlikini eskertip ötken.

Toluq bet