Tarim néfitliki xitayning sherqidiki 400 milyon ahalini tebi'iy gaz bilen teminlimekte

Xitayning "Junggo néfit shirkiti" ge qarashliq tarim néfitliki "Gherbning gazini sherqqe yötkesh turubisi" arqiliq xitayning sherqige jaylashqan 120 dek chong-kichik sheherdiki 400 milyon ahale we 3000 karxanini tebi'iy gaz bilen teminlimektiken. Shinxu'a agéntliqining 7-yanwar ashkarilishiche, mezkur turuba yolining 2020-yiligha kelgende gaz toshush omumiy miqdari 270 milyard küp métirdin éship ketken. Xewerde mezkur turuba yolining her küni 95 milyon küp métir gaz toshuydighanliqi bildürülgen.

Shinxu'a agéntliqining éytishiche, bu tebi'iy gaz tarim néfitlikining yéngi mehelle, kara-2, dina-2 qatarliq gazliqliridin yollinidiken. Xitayning "Gherbning gazini sherqqe yötkesh" turubisi 2004-yili qurulghan bolup, deslepki mezgilde yiligha 351 milyon küp métir gaz yollan'ghan, bara-bara köpiyip yiligha 25 milyard küp métirdin artuq yollaydighan sewiyege yetken. Eyni chaghda bu qurulush Uyghur teshkilatlirining qattiq qarshi turushqa uchrighan bolup, ular bu qurulushning yerlik xelqqe payda élip kelmeyla qalmay, uning muhitni weyran qilidighanliqi, Uyghurlarning pa'aliyet boshluqi téximu tariyidighanliqini agahlandurghan idi.

Közetküchilirining qeyt qilishiche, gerche tarim néfitliki 400 milyon xitay ahalisini gaz bilen teminlisimu, lékin buningdin gaz chiqiwatqan jaylardiki Uyghurlar paydilinalmaydiken. Ular bu rayondiki Uyghurlarning hazirgha qeder yéqilghuda qiynilidighanliqini bildürmekte. Shinxu'a agéntliqining ashkarilishiche, 3000 kilométir uzunluqtiki turuba yolining Uyghur élidiki asasliq qismi bingtu'en jaylashqan 41 nahiye, sheher, 21 yéza igilik meydanidin ötidiken. Xewerde, jenubtiki 4 yérim milyon ahalining buningdin menpe'etlinidighanliqi éytilghan, lékin buning ichide yerlik xelqning qanche pirsentni igileydighanliqi tilgha élinmighan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar