Бу йил америка юқири техникилиқ пахта йиғиш машиниси «җон дер» ниң уйғур диярида сетилиши шиддәтлик артқан

Мухбиримиз әркин
2020-08-11
Елхәт
Пикир
Share
Принт

Бу йил америкадики «җон дер» намлиқ йеза игилик машинисазлиқ ширкитиниң юқири техникилиқ пахта йиғиш машинилириниң уйғур диярида сетилиши шиддәтлик артқан. «Җәнубий хитай сәһәр почтиси» гезитиниң ашкарилишичә, «җон дер» пахта йиғиш машиналириниң уйғур диярида бу йил 4-айдики сетилиши өткән йилниң охшаш мәгилидикидин 4000 пирсәнт артқан. Америка хитайниң уйғур дияридики кишилик һоқуқ дәпсәндичиликигә ембарго йүргүзгән бир мәзгилдә америка пахта йиғиш машинисиниң районда сетилишиниң шиддәтлик артиши көзәткүчиләрниң диққитини қозғиди.

Көзәткүчиләрниң тәкитлишичә, бу әһвални уйғурларниң кәң көләмдә лагерларға қамилип, пахта үзүшкә әмгәк күчи йетишмәслик яки хитай йеза игилик фермилиридики ембарго әндишиси кәлтүрүп чиқарған болуши мумкин икән. Америка һөкүмити йеқинда «шинҗаң ишләпчиқириш-қурулуш биңтуәни» вә униң икки рәһбиригә ембарго қойған. «Җәнубий хитай сәһәр почтиси» ниң тәкитлишичә, 2019-йили 4-айда уйғур дияри 2 милйон 650 миң долларлиқ «җон дер» маркилиқ пахта үзүш машиниси импорт қилған болуп, бу йил 4-айда бу 117 милйон 600 миң долларларға чиққан. Бу йил 5-айда йәнә 94 милйон долларлиқ машина импорт қилинған.

Хәвәрдә, бу сода уйғур дияридики пахтизарлиқларниң 3 дин бир қисмини игилләйдиған биңтуәнниң райондики деһқанчилиқ ишлирини күчәйтишигә ярдәм беридиғанлиқи тәкитләнгән. Хәвәрдә қәйт қилинишичә, биңтуәнниң қармиқидики шихәнзә, бейтун қатарлиқ шәһәрлиридә «җон дер» ниң машина сетиш орунлири бар икән. Америка малийә министирлиқи 1-июл күни биңтуәнгә ембарго қоюп, ширкәтләргә бу йил 30-сентәбиргә қәдәр биңтуән вә униңға қарашлиқ орунлар билән алақисини үзүшигә мөһләт бәргәниди.

Пикирләр (0)
Share
Толуқ бәт