Bu yil amérika yuqiri téxnikiliq paxta yighish mashinisi "Jon dér" ning Uyghur diyarida sétilishi shiddetlik artqan

Muxbirimiz erkin
2020-08-11
Élxet
Pikir
Share
Print

Bu yil amérikadiki "Jon dér" namliq yéza igilik mashinisazliq shirkitining yuqiri téxnikiliq paxta yighish mashinilirining Uyghur diyarida sétilishi shiddetlik artqan. "Jenubiy xitay seher pochtisi" gézitining ashkarilishiche, "Jon dér" paxta yighish mashinalirining Uyghur diyarida bu yil 4-aydiki sétilishi ötken yilning oxshash megilidikidin 4000 pirsent artqan. Amérika xitayning Uyghur diyaridiki kishilik hoquq depsendichilikige émbargo yürgüzgen bir mezgilde amérika paxta yighish mashinisining rayonda sétilishining shiddetlik artishi közetküchilerning diqqitini qozghidi.

Közetküchilerning tekitlishiche, bu ehwalni Uyghurlarning keng kölemde lagérlargha qamilip, paxta üzüshke emgek küchi yétishmeslik yaki xitay yéza igilik férmiliridiki émbargo endishisi keltürüp chiqarghan bolushi mumkin iken. Amérika hökümiti yéqinda "Shinjang ishlepchiqirish-qurulush bingtu'eni" we uning ikki rehbirige émbargo qoyghan. "Jenubiy xitay seher pochtisi" ning tekitlishiche, 2019-yili 4-ayda Uyghur diyari 2 milyon 650 ming dollarliq "Jon dér" markiliq paxta üzüsh mashinisi import qilghan bolup, bu yil 4-ayda bu 117 milyon 600 ming dollarlargha chiqqan. Bu yil 5-ayda yene 94 milyon dollarliq mashina import qilin'ghan.

Xewerde, bu soda Uyghur diyaridiki paxtizarliqlarning 3 din bir qismini igilleydighan bingtu'enning rayondiki déhqanchiliq ishlirini kücheytishige yardem béridighanliqi tekitlen'gen. Xewerde qeyt qilinishiche, bingtu'enning qarmiqidiki shixenze, béytun qatarliq sheherliride "Jon dér" ning mashina sétish orunliri bar iken. Amérika maliye ministirliqi 1-iyul küni bingtu'en'ge émbargo qoyup, shirketlerge bu yil 30-séntebirge qeder bingtu'en we uninggha qarashliq orunlar bilen alaqisini üzüshige möhlet bergenidi.

Toluq bet