Бу йил уйғур диярида пахта теридиған әмгәк күчи азийип кәткән

Мухбиримиз сада
2018-10-08
Елхәт
Пикир
Share
Принт

Игилинишичә, уйғур дияриниң шималидики пахта етизлирида йиллардин бери давамлишип келиватқан адәм күчи билән пахта териш иши бу йилдин башлап машина билән теришқа өзгәргәнлики мәлум.

«Тәңритағ тори» ниң 8-өктәбир күнидики хәвиридә илгирики йиллардики пахта тәргүчиләрниң орнини аптоматик пахта териш машинисиниң алғанлиқи һәққидә учур берилгән. Хәвәрдә пахта теришниң аптоматлаштурулишида пахта теридиған адәм күчиниң барғансери азлап кетишиниң сәвәб болғанлиқи ениқ әскәртилгән.

Хәвәрдә манас наһийәсиниң мәлум базиридики 17 йилдин бери пахта терип келиватқан ли шөмиң исимлик бир деһқанниң сөзи нәқил елинған. У сөзидә алдинқи йилларда пахта тәргүчиләрни тепиш үчүн өзиниң пойиз истансиси, узун йоллуқ аптобус бекити қатарлиқ җайларда лозункиларни тутуп күн-күнләп олтуруп адәм күчи топлиғанлиқини баян қилған. У пахта териш машинилаштурулғандин кейин адәм издәш аваричиликидин қутулғанлиқини, пайдисиниңму көрүнәрлик болғанлиқини тилға алған.

Хитай һөкүмити алдинқи йилларда уйғур дияридики уйғур деһқанларниң йәр-земинлириниң бәзилирини «көкәртиш елип берип, айродромни гүзәлләштүрүш»дегән намлар билән мәҗбурий йосунда өз илкигә өткүзүвалған болса, бәзилирини хитай һөддигәрләргә әрзан баһада өткүзүп бериш арқилиқ уйғур деһқанлирини терилғу йәргә игидарлиқ қилиш һоқуқидин мәһрум қилған иди.

Көзәткүчиләрниң қаришичә, күзлүк мол-һосул пәслидә деһқанларниң азлап кетиши йеқиндин мәзгилдин буян милйонлиған уйғур мусулманлириниң хитай һөкүмити тәрипидин халиғанчә тутқун қилинип, бир аилидики қурамиға йәткән кишиләрниң асасән дегүдәк лагерларға солинип кетиши билән зич мунасивәтлик икән.

Пикирләр (0)
Share
Толуқ бәт