Америка әлчиханиси: «ғалимбек шағиманниң мәсилисигә йеқиндин диққәт қиливатимиз»

Мухбиримиз әркин
2019-02-11
Елхәт
Пикир
Share
Принт

Америкиниң бейҗиңда турушлуқ баш әлчиханиси 11‏-феврал баянат елан қилип, хәлқара җәмийәтни өзиниң хитайға қайтурулмаслиқиға ярдәм қилишқа чақирған қазақ пуқраси ғалимбек шағиманниң мәсилисигә диққәт қиливатқанлиқини билдүргән.

Азадлиқ радийосиниң хәвәр қилишичә, америкиниң бейҗиңда турушлуқ әлчиханисиниң баянатчиси дүшәнбә күни бирләшмә агентлиқиға сөз қилип, әлчиханиниң б д т мусапирлар мәһкимиси вә «алақидар һөкүмәтләр» билән ғалимбек шағиманниң мәсилиси һәққидә алақиләшкәнликини билдүргән.

Гуаңҗуда турушлуқ қазақ тиҗарәтчи ғалимбек уйғур аптоном райониниң толи наһийәсидин болуп, у йеқинда айропиланға олтуруп тайланд вә өзбекистан арқилиқ қазақистанға кирмәкчи болған. Бирақ қазақистан даирилири намәлум сәвәбләр билән униң қазақистанға киришини рәт қилған шундақла уни өзбекистанға қайтурувәткән.

Өзбекистан даирилириму униң чеградин киришини рәт қилған иди. Ғалимбек 7 вә 8‏-феврал күнлири ташкәнт айродромида туруп, хәлқара җәмийәтниң өзиниң хитайға қайтурулмаслиқиға ярдәм беришини тәләп қилған иди.

Азадлиқ радийосиниң билдүрүшичә, америкиниң бейҗиңда турушлуқ әлчиханисиниң баянатчиси бирләшмә агентлиқиға қилған сөзидә: «биз, 3‏-дөләтни б д т мусапирлар алий комиссарияти, б д т ниң башқа органлири вә ғәйрий һөкүмәт тәшкилатлирини сиясий панаһлиқ тилигүчи бу шәхсләр билән учришип, уларниң қоғдиниш тәлипини көздин кәчүрүшкә һәм уларға ярдәмдә болушқа чақиримиз» дегән.

Ғалимбекниң ташкәнт айродромидики вақтида билдүрүшичә, хитайниң ташкәнттики әлчиханиси уни қайтуруп кәтмәкчи болған икән. Нөвәттә өзбекистанниң уни тайландқа қайтурувәткәнлики илгири сүрүлмәктә.

Өзбекистан ташқи ишлар министирлиқи елан қилған бу һәқтики баянатида, ғалимбекниң 9‏-феврал күни тайландқа учуп кәткәнлики илгири сүрүлгән. Лекин, азадлиқ радийосиниң билдүрүшичә, нөвәттә униң қәйәрдә икәнлики мәлум әмәс икән. Бирләшмә агентлиқиниң билдүрүшичә, б д т мусапирлар алий комиссариятиниң тайландта турушлуқ ишханиси сиясий панаһлиқ делолириниң мәхпийәтлик мәсилиси сәвәблик униң һәққидә һәрқандақ учур беришни рәт қилған.

Көзәткүчиләрниң билдүрүшичә, хитай даирилириниң уйғур аптоном районидики бастуруши бурун нуқтилиқ уйғурларға қаритилип, райондики бир йерим милйондәк қазақ буниңдин сақлинип кәлгән икән. Лекин, хитай һөкүмити 2017‏-йилдин башлап қазақларниму охшашла лагерларға солаш вә тәқибләшкә башлиған.

Пикирләр (0)
Share
Толуқ бәт