Amérika elchixanisi: "Ghalimbék shaghimanning mesilisige yéqindin diqqet qiliwatimiz"

Muxbirimiz erkin
2019-02-11
Élxet
Pikir
Share
Print

Amérikining béyjingda turushluq bash elchixanisi 11‏-féwral bayanat élan qilip, xelq'ara jem'iyetni özining xitaygha qayturulmasliqigha yardem qilishqa chaqirghan qazaq puqrasi ghalimbék shaghimanning mesilisige diqqet qiliwatqanliqini bildürgen.

Azadliq radiyosining xewer qilishiche, amérikining béyjingda turushluq elchixanisining bayanatchisi düshenbe küni birleshme agéntliqigha söz qilip, elchixanining b d t musapirlar mehkimisi we "Alaqidar hökümetler" bilen ghalimbék shaghimanning mesilisi heqqide alaqileshkenlikini bildürgen.

Gu'angjuda turushluq qazaq tijaretchi ghalimbék Uyghur aptonom rayonining toli nahiyesidin bolup, u yéqinda ayropilan'gha olturup tayland we özbékistan arqiliq qazaqistan'gha kirmekchi bolghan. Biraq qazaqistan da'iriliri namelum sewebler bilen uning qazaqistan'gha kirishini ret qilghan shundaqla uni özbékistan'gha qayturuwetken.

Özbékistan da'irilirimu uning chégradin kirishini ret qilghan idi. Ghalimbék 7 we 8‏-féwral künliri tashkent ayrodromida turup, xelq'ara jem'iyetning özining xitaygha qayturulmasliqigha yardem bérishini telep qilghan idi.

Azadliq radiyosining bildürüshiche, amérikining béyjingda turushluq elchixanisining bayanatchisi birleshme agéntliqigha qilghan sözide: "Biz, 3‏-döletni b d t musapirlar aliy komissariyati, b d t ning bashqa organliri we gheyriy hökümet teshkilatlirini siyasiy panahliq tiligüchi bu shexsler bilen uchriship, ularning qoghdinish telipini közdin kechürüshke hem ulargha yardemde bolushqa chaqirimiz" dégen.

Ghalimbékning tashkent ayrodromidiki waqtida bildürüshiche, xitayning tashkenttiki elchixanisi uni qayturup ketmekchi bolghan iken. Nöwette özbékistanning uni taylandqa qayturuwetkenliki ilgiri sürülmekte.

Özbékistan tashqi ishlar ministirliqi élan qilghan bu heqtiki bayanatida, ghalimbékning 9‏-féwral küni taylandqa uchup ketkenliki ilgiri sürülgen. Lékin, azadliq radiyosining bildürüshiche, nöwette uning qeyerde ikenliki melum emes iken. Birleshme agéntliqining bildürüshiche, b d t musapirlar aliy komissariyatining taylandta turushluq ishxanisi siyasiy panahliq délolirining mexpiyetlik mesilisi seweblik uning heqqide herqandaq uchur bérishni ret qilghan.

Közetküchilerning bildürüshiche, xitay da'irilirining Uyghur aptonom rayonidiki basturushi burun nuqtiliq Uyghurlargha qaritilip, rayondiki bir yérim milyondek qazaq buningdin saqlinip kelgen iken. Lékin, xitay hökümiti 2017‏-yildin bashlap qazaqlarnimu oxshashla lagérlargha solash we teqibleshke bashlighan.

Toluq bet