Qazaqistan'gha qéchip chiqqan sabiq lagér oqutquchisi xitaygha qayturulush xewpige duch kelgen

Muxbirimiz erkin
2019-02-15
Élxet
Pikir
Share
Print

Ötken yili qazaqistan'gha qéchip chiqqan mongghulkürelik qazaq lagér oqutquchisi sayragül sa'utbay özining xitaygha qayturulush xewpige duch kelgenliki, dunyaning özining xitaygha qayturulmasliqi üchün yardem qilishini telep qilghan.

Bu yil 42 yashliq sayragülning radiyomizgha bildürüshiche, nöwette qazaqistan hökümiti xitayni xapa qilip qoymasliq üchün uninggha panahliq bérishni ret qilmaqta iken.

U 14‏-féwral radiyomiz xitay bölümining ziyaritini qobul qilghanda dunyadiki her qaysi dölet hökümetlirini yardemge chaqirip, "Qazaqistan hökümiti méning qazaqistanda qélishimni xalimaywatidu. Chünki bu, qazaqistan bilen xitayning siyasiy, soda munasiwitige qattiq tesir qilidu, dep qarimaqta.

Hazir méning ehwalim bek xeterlik. Men her waqit xitaygha qayturuwétilishim mumkin. Shunga, men her qaysi el xelqlirige we her sahe zatlirigha ötünimen, mendek bichare bir ana silerning yardiminglargha bek mohtaj. Men erkinlikni we a'ilem bilen menggülük jem bolushni arzu qilimen" dégen.

Sayragül sa'utbay 2017‏-yili 11‏-aydin 2018‏-yili 3‏-ayghiche mongghulküre nahiyesidiki bir yighiwélish lagérida mejburiy oqutquchiliqqa sélin'ghan. U 2018‏-yili 5‏-ayda chégra atlap qazaqistan'gha qéchip chiqqan. Lékin qazaqistan da'iriliri uni "Chégradin qanunsiz kirgen" dep eyiblep tutqun qilghan hem sotqa tartqan.

Qazaqistan sot mehkimisi uning üstidin axirqi qétim ötken yili 12‏-ayda sot échip, uning qazaqistanda qélish qalmasliqigha qarar qilishni bu yil 2‏-aygha kéchiktürgen idi. Lékin, qazaqistandiki "Ata yurt pida'iyliri" namliq ammiwi guruhning bashliqi sérikjan bilesh'oghlining muxbirimizgha bildürüshiche, taldiqorghan sheherlik sot 15‏-féwral sayragülning délosini körüp chiqqan bolsimu, lékin yene höküm chiqarmighan. Sot uning délosini kéler aygha kéchiktürgen. Bu, uning délosining 11 ‏-qétim kéchiktürülüshidur.

Toluq bet