Алтай вилайитиниң чиңгил наһийисидә йәнә бир түркүм қазақ чарвичилар олтурақ һаятқа мәҗбурланған

Мухбиримиз ирадә
2019-08-15
Елхәт
Пикир
Share
Принт

Уйғур елида йәнә бир түркүм қазақ чарвичилар әсирләрдин бери яшап кәлгән юрт-маканлиридин айрилип, һөкүмәт тәрипидин селинған олтурақ өйләргә көчкәнлики мәлум.

«Тәңритағ» ториниң 15-авғуст күни хәвәр қилишичә, мушу айниң оттурилири алтай вилайитиниң чиңгил наһийиси тәвәсидики 800 дин ошуқ қазақ чарвичи һөкүмәт тәрипидин чарвичиларни орунлаштуруш үчүн селинған 83 квадрат метирлиқ өйләргә көчүп киргән. 

Диққәт қозғайдиғини шуки, «тәңритағ» ториниң хәвиридә «қазақ чарвичиларниң һөкүмәтниң көңүл бөлүши билән заманниң арқисида қалған, қалақ көчмән чарвичилиқ һаятидин қутулуп, шәһәр һаятиға көчкәнлики» ни илгири сүрүлгән вә буни «намратлиқни түгитишниң үнүмлүк чариси,» дәп чүшәндүрүлгән.

Һалбуки, чәтәлләрдики көзәткүчиләр уйғур елидики чарвичи аһалиләрни мәҗбурий һалда олтурақ һаятқа көчүрүшниң әмәлийәттә көчмән хитайлар үчүн йәр бошитиш икәнликини, буниң б д т ниң йәрлик хәлқләрниң яшаш усулини мәҗбурий өзгәртмәслик программисиға хилап икәнликини тәкитлимәктә.

Юқириқи хәвәрдә ейтилишичә, даириләр 2011-2020-йили арисида 170 миңға йеқин чарвичи аилиси вә 760 миңдин ошуқ чарвичи аһалини олтурақ һаятқа көчүрүп болидикән. 

Өткән он нәччә йилдин буян мушу хилдики чарвичиларни тағдин көчүрүш һәрикәтлиридин кейин көплигән тағлиқ районлар вә деһқанчилиқ базилирини хитай саяһәт ширкәтлириниң қар тейилиш мәйдани, меһмансарай вә саяһәт райони қилип қуруп чиққанлиқи, нәтиҗидә буниң билән көплигән иккиләмчи иҗтимаий мәсилиләргә вә муһит булғинишиға сәвәб болуватқанлиқи һәққидә түрлүк хәвәрләр оттуриға чиққан иди.

Пикирләр (0)
Share
Толуқ бәт