Altay wilayitining chinggil nahiyiside yene bir türküm qazaq charwichilar olturaq hayatqa mejburlan'ghan
2019.08.15
Uyghur élida yene bir türküm qazaq charwichilar esirlerdin béri yashap kelgen yurt-makanliridin ayrilip, hökümet teripidin sélin'ghan olturaq öylerge köchkenliki melum.
“Tengritagh” torining 15-awghust küni xewer qilishiche, mushu ayning otturiliri altay wilayitining chinggil nahiyisi tewesidiki 800 din oshuq qazaq charwichi hökümet teripidin charwichilarni orunlashturush üchün sélin'ghan 83 kwadrat métirliq öylerge köchüp kirgen.
Diqqet qozghaydighini shuki, “Tengritagh” torining xewiride “Qazaq charwichilarning hökümetning köngül bölüshi bilen zamanning arqisida qalghan, qalaq köchmen charwichiliq hayatidin qutulup, sheher hayatigha köchkenliki” ni ilgiri sürülgen we buni “Namratliqni tügitishning ünümlük charisi,” dep chüshendürülgen.
Halbuki, chet'ellerdiki közetküchiler Uyghur élidiki charwichi ahalilerni mejburiy halda olturaq hayatqa köchürüshning emeliyette köchmen xitaylar üchün yer boshitish ikenlikini, buning b d t ning yerlik xelqlerning yashash usulini mejburiy özgertmeslik programmisigha xilap ikenlikini tekitlimekte.
Yuqiriqi xewerde éytilishiche, da'iriler 2011-2020-yili arisida 170 minggha yéqin charwichi a'ilisi we 760 mingdin oshuq charwichi ahalini olturaq hayatqa köchürüp bolidiken.
Ötken on nechche yildin buyan mushu xildiki charwichilarni taghdin köchürüsh heriketliridin kéyin köpligen taghliq rayonlar we déhqanchiliq bazilirini xitay sayahet shirketlirining qar téyilish meydani, méhmansaray we sayahet rayoni qilip qurup chiqqanliqi, netijide buning bilen köpligen ikkilemchi ijtima'iy mesililerge we muhit bulghinishigha seweb boluwatqanliqi heqqide türlük xewerler otturigha chiqqan idi.