Uyghur élidin kélip, qirghizistanda oquwatqan nurghun qirghiz oqughuchi yurtigha qaytip ghayib bolghan

Muxbirimiz erkin
2019-04-01
Share

Uyghur diyaridin kélip, qirghizistanda oquydighan nurghun qirghiz oqughuchilarning 2017 ‏-2018‏-yilliq qishliq tetilde Uyghur rayonidiki yurtigha qaytip kétip iz-déreksiz ghayib bolghanliqi ilgiri sürüldi.

Pa'aliyetchi jéné buninning 31‏-mart küni "Tashqi siyaset" tor zhurnilida élan qilghan maqaliside ashkarilinishiche, qirghizistan döletlik uniwérsitétining rus tili we slawyan filologiye penliri fakultétida oquydighan az dégende 20 qirghiz oqughuchi 2017‏ ‏-2018‏-yilliq qishliq tetilde yurtigha qaytip kétip qayta kélelmigen.

Ghayib bolghan yuqiriqi qirghiz oqughuchilirining ichide qirghizlarning ataqliq manaschisi merhum yüsüp mamayning newrisi turghaneli tursun'elimu bar iken.

Qirghizistan ilgiri yüsüp mamaygha "Qirghizistan jumhuriyitining qehrimani" dep nam bergen idi. Jéné buninning bildürüshiche, tursun'eli bowisigha oxshash xéli tonulghan manaschi iken. U yene qirghizistanda usul istudiyosi qurup, "Qara yorgha" namliq ataqliq qirghiz usulini qirghizistanda sehnige élip chiqishta halqiliq rol oynighan iken.

Qirghizistan dölet uniwérsitétining jéné bunin'gha bergen uchurida qeyt qilinishiche, mezkur uniwérsitét qishliq tetilge kétip qaytip kélelmigen qirghiz oqughuchilirining "Oqush pulini tölimigen", "Derske qatnashmighan" dégen seweb bilen oqush tewelikini bikar qilghan.

Fakultét mudiri Uyghur rayonining weziyiti éniq tursimu néme üchün ular yene qaytip ketti, dégen so'algha: "Oqughuchilarning ata-anisi tehditke uchrighan" dégen jawabni bergen. Uning qeyt qilishiche, da'iriler ata-anilargha perzentlirini dawamliq chet'elde oqutsa ularning jazalinidighanliqi heqqide tehdit salghan iken. Lékin, jéné buninning bildürüshiche, "Xitaydiki qirghizlarni qollash komitéti" namliq teshkilatning tizimlikide qaytip kétip qayta kélelmigen téximu köp qirghiz oqughuchining ismi bar iken.

U, mezkur teshkilatning tizimlikide bishkektiki asasliq uniwérsitétlarda oquwatqan 45 neper qirghiz oqughuchining qaytip kétip kélelmigenlikini bildürgen. Lékin qirghizistan hökümiti mezkur mesilige qarita izchil passip pozitsiye tutup keldi.

Qirghizistan prézidénti sorunbay jénbékof ötken yili 19‏-dékabirda Uyghur rayonidiki tutqunlar mesilisige nahayiti "Éhtiyatchan diplomatik pozitsiye" tutushqa toghra kélidighanliqi, qirghizistan xitayning "Ichki ishliri" gha arilishalmaydighanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet