Хитай бу рамизан ейида омман әлчисигә уйғурлар һәққидә сахта тәшвиқат елип барған

Мухбиримиз җәвлан
2022.04.20
Share on WhatsApp
Share on WhatsApp

“хитай хәвәрлири тори” ниң 20-апрелдики хәвиригә қариғанда, хитай даирилири омманниң хитайда турушлуқ баш әлчиси, әлчихана хадимлири, содигәрлири, мухбирлирини видийолуқ сөһбәткә тәклип қилип, уйғур районини екран арқилиқ “саяһәт” қилдурған һәмдә уларға “уйғур мусулманлириниң өз етиқади бойичә хатирҗәм, әркин, баяшат яшаватқанлиқи” ни көрсәткән.

Бу паалийәттә, уйғур аптоном районлуқ сиясий кеңәшниң муавин рәиси нурум исмайилқан “уйғур райониниң тәрәққияти” ни тонуштурған; һәр саһәдики “хәлқ вәкиллири” му екранға чиқип өз турмушини махтиған; хотән наһийә сай мәсчитиниң имами абдухәбәр турсунмуһәммәт өзлириниң рамизан ейида нормал роза тутуп, мәсчитләргә берип ибадәт қиливатқанлиқини ейтқан.

Хәвәрдә ейтилишичә, омманниң хитайдики баш әлчиси насир әбусәид бу паалийәттин кейин тәсиратини сөзләп, өзиниң 2020-йили әрәб әлчилири өмики билән бирликтә үрүмчи, қәшқәр, ақсу қатарлиқ җайларни зиярәт қилғанлиқи, “җәмийәтниң муқим, хәлқ турмушиниң параван икәнлики” ни көргәнликини ейтқан.

Көзәтчиләрниң билдүрүшичә, хитай һөкүмити аввал әрәб әлчилирини уйғур районида ойнатқан, андин уларға тәшвиқатини башлиған; өткәндә мисир, сүрийә, пәләстин әлчилиригә тәшвиқат елип барған болса, бу қетим оман әлчисини нишанға алған. Хитайниң рамизан ейи мәзгилидә бундақ көз боямчилиқни давамлаштуруши һәқиқий вәзийәттин хәвири йоқ мусулманларни техиму ғәпләттә қоюш ролини ойнайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт