Xitay hökümitining ramizan harpisida ikki Uyghur kadirni jazalishi xelq'araning diqqitini qozghidi

B b s ning 1-iyundiki xitayche xewiride we roytéris agéntliqining shu künki xewiride éytilishiche, aqsu wilayetlik ottura sot mehkimisi siyasiy bölümining sabiq mu'awin mudiri we sodiyesi polat chawar “Térror gumandarlirigha yénik jaza höküm qilghan”, “Sot mehkimisining sot hökümini öz meyliche özgertken” dégendek jinayetler bilen wezipisidin qaldurulghan hemde partiyidin chiqirilghan.

Aqsu wilayetlik intizam tekshürüsh komitétining bu heqtiki uqturushida “Polat chawar kompartiye ezasi we sot xadimi turup ‛üch xil küchler‚ we térrorchilargha qattiq zerbe bérish mesiliside siyasiy meydani mustehkem bolmighan, pozitsiyede qattiq bolmighan” déyilgen.

Shuning bilen bir waqitta radi'omiz xitay bölümining igilishiche, aqsu wilayetlik ormanchiliq idarisi kökertish ishxanisining sabiq mu'awin mudiri ömerjan hesen “Intizamgha xilapliq qilish” sewebidin partiyidin chiqirilghan we xizmettin heydelgen. Aqsu wilayetlik intizam tekshürüsh komitétining uqturushida “Ömerjan hesen partiye ezasi turup herqaysi metbu'at orunlirida shinjangning tarixini burmilash, jem'iyetke ziyanliq uchurlarni tarqitish, partiyining we hökümetning obrazini xunükleshtürüsh, döletning birlikige buzghunchiliq qilish, milletler ittipaqliqi we ijtima'iy muqimliqqa ziyan sélish mezmunidiki köpligen yazmilarni élan qilghanliqi hemde özining partiyiwilikini yoqatqanliqi ” üchün yuqiriqidek jaza bérilgenliki qeyt qilin'ghan.

Dunya Uyghur qurultiyining bayanatchisi dilshat réshit 1-iyun küni radiyomiz xitay bölümining ziyaritini qobul qilip, xitayning bu ikki kishige jaza bérishi emeliyette Uyghurlargha heywe körsitishni meqset qilidighanliqini körsetken. U bu heqte toxtilip “Polat chawarning sot tertipide qanun boyiche ish körüshtin bashqa héchqandaq xataliqi yoq, ömerjan bolsa asasiy qanundiki puqralargha bérilgen hoquqlar boyiche öz pikrini ipadilep, xitayning ‛shinjang ezeldin xitayning bir qismi‚ deydighan sepsetisige qarshi maqaliler yazghan. Xitay bolsa bularni öz nopuzigha xiris qilghanliq dep qaraydu ” dégen.