Uyghur élidiki siyasiy-qanun kontrolluqi üchün yene bir ayrim idare quruldi

Muxbirimiz ümidwar
2018-01-28
Share

Xitay da'iriliri Uyghur élide atalmish "Üch xil küch" ler we "Ikki yüzlimichi" lerge zerbe bérishni hessilep kücheytip, hemmila yerde "Yépiq terbiyilesh merkezliri" ni qurup, kadirdin tartip, déhqan we oqutquchi-oqughuchi, tijaretchi we bashqilarni öz ichige alghan zor sandiki Uyghurlarni solap, siyasiy terbiye bériwatqanda, yene bir siyasiy-qanun sahesige a'it ayrim toluq hoquqluq organ - Uyghur aptonom rayonluq réwiziye komitéti resmiy quruldi.

27-Yanwar küni Uyghur aptonom rayonluq réwiziye komitéti dep atalghan mezkur organ resmiy wiwiska asqan bolup, bu murasimgha Uyghur aptonom rayonluq partkomning mu'awin sékrétari li péngshin, mezkur réwiziye komitétining mudiri lo dongchüen qatarliqlar ishtirak qilghan.

"Shinjang géziti" ning xewiride ilgiri sürülüshiche, Uyghur aptonom rayonluq réwiziye komitétini qurushtiki meqset kompartiyeni omumi yüzlük idare qilish we Uyghur rayonining "Ijtima'iy muqimliqi hem ebediy eminlikini emelge ashurushtin ibaret bash nishani qet'iy qoghdash" tin ibaret iken. 

Uyghur aptonom rayonluq réwiziye komitéti, xitay dölet kabinéti we herbiy islar komitéti bilen teng derijilik aliy hoquqluq organ hésablinidighan-xitay döletlik réwiziye komitétining tarmiqi hésablinidiken. Uyghur aptonom rayonluq réwiziye komitéti qurulushtin ilgiri aldi bilen Uyghur rayonidiki 105 nahiye we sheherde hem ishlepchiqirish qurulush armiyisining 14 déwiziyiside tarmaq komitétlar qurulup bolun'ghan idi.

Bu komitét asasliqi kadirlar, xizmetchilerge qarita soraq qilish, tekshürüsh, tutqun qilish we bashqa hoquqlargha ige iken.

Közetküchilerning qarishiche, mezkur komitétning xitayning bashqa ölkiliridiki asasiy wezipisi chiriklikni bir terep qilish bolsa, Uyghur rayonidiki pa'aliyitide Uyghur kadirliri, ish-xizmetchilirining "Ikki yüzlimichilik" qilmishi, jümlidin ulardiki milliy idiye, diniy xahishlar we bashqilargha zerbe bérishni téximu kücheytish aldinqi orun'gha qoyulushi mumkin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet