Uyghur élida ikkinchi qétimliq omumiy xelq salametlik tekshürüsh herikiti bashlan'ghan

Muxbirimiz qutlan
2017-07-24
Share

Xitay hökümiti Uyghur élida ikkinchi qétimliq "Omumiy xelq heqsiz salametlik tekshürüsh" herikitini bashlighan bolup, 7-ayning 19-künige qeder jem'iy 4 milyon 270 mingdin artuq kishining salametlikini tekshürüp, ularning shexsiy salametlik arxipini turghuzup bolghanliqi melum.

"Shinjang géziti" ning bu heqtiki xewirige qarighanda, ikkinchi qétimliq "Omumiy xelq salametlik tekshürüsh" herikitining asasliq nishani jenubtiki 3 wilayet bir oblastqa qaritilghan bolup, salametliki tekshürülgen 4 milyon kishi ichide jenubtin tekshürülgenler 3 milyon 200 ming kishini teshkil qilidiken.

Igilinishiche, xitay hökümiti ötken yili 9-aydin buyan Uyghur aptonom rayonida "Omumiy xelq salametlik tekshürüsh" herikiti qozghap, birinchi qétimda jem'iy 17 milyon 500 ming ahalining shexsiy salametlik arxipini turghuzghan. Buning üchün xitay hökümitining jem'iy bir milyard 500 milyon yüen meblegh salghanliqi melum.

Bu yil 2-aydin bashlap xitay hökümiti Uyghur diyarida ikkinchi qétimliq "Omumiy xelq salametlik tekshürüsh" herikitini bashlighan.

Igilinishiche, bu qétim Uyghur diyarida jem'iy 21 milyon kishining salametliki tekshürülüp, qan ewrishkisi élinidiken. Buning üchün xitay hökümiti jem'iy 1 milyard 780 milyon meblegh ajratqanliqi melum.

Xitay hökümitining Uyghur diyarida élip bériwatqan mejburiy yosundiki "Omumiy xelq salametlik tekshürüsh" herikiti, bolupmu her bir shexsning qan we d n a ewrishkisini élip, shexsiy salametlik arxipini turghuzushi xelq'ara jem'iyetning küchlük diqqitini qozghimaqta.

Bezi mutexessisler, xitayning Uyghur aptonom rayonida, jümlidin bu rayondiki melum bir milletni nuqta qilip "Salametlik tekshürüsh" bahaniside shexslerning qan ewrishkisini toplishi kishilerning gumanini qozghaydighan bir heriket, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet