Хитай байинғолин областида аманлиқ күчлириниң көлимини давамлиқ кеңәйтмәктә

Мухбиримиз әркин
2020.06.22
Share on WhatsApp
Share on WhatsApp

Хитай һөкүмити уйғур аптоном райониниң байинғолин областида аманлиқ күчлириниң көлимини давамлиқ кеңәйтмәктә. Униң немә үчүн мәзкур областта аманлиқ күчлирини давамлиқ көпәйтидиғанлиқиниң сәвәби мәлум әмәс. Даириләр техи йеқиндила корла шәһиригә штат сиртида 2000 сақчи қобул қилиш елани чиқарған иди. Лекин хитай таратқулириниң ашкарилишичә, корла шәһәрлик хизмәтчи қобул қилиш рәһбәрлик ишханиси 20-июн күни мәзкур шәһәргә йәнә 500 нәпәр штат сиртида сақчи қобул қилиш елан чиқарған. Йеңи қобул қилинидиған бу сақчилар корла шәһиридики “қулайлиқ сақчи понкитлири” да вәзипә өтәйдикән.

Байинғолин области өткән йилдин бери мәзкур областниң җамаәт хәвпсизлик вә әдлийә органлириға көпләп хизмәтчи қобул қилип, чәтәлдики уйғур кишилик һоқуқ тәшкилатлириниң диққитини қозғиған. Корла шәһири бу йил 3-айда мәзкур шәһәрдики “қулайлиқ сақчи понкитлири” ға штат сиртида 2000 нәпәр сақчи қобул қилидиғанлиқини елан қилған иди. Көзәткүчиләр илгири уйғур дияридики әң чоң йиғивелиш лагерлириниң корла әтрапиға җайлашқанлиқини илгири сүргән. Лекин байинғолин областиға көпләп сақчи қобул қилишниң буниң билән алақиси бар-йоқлуқи мәлум әмәс.

Корла шәһәрлик хизмәтчи қобул қилиш рәһбәрлик ишханисиниң уқтурушида тәкитлинишичә, илтимас қилғучиларниң аилисидики 3 әвлад кишиләрниң ичидә “миллий бөлгүнчилик”, “қанунсиз диний паалийәт”, “террорлуқ” яки “дөләт бихәтәрлики” гә четилип җазаланғанлар болса қобул қилинмайдикән. Көзәткүчиләрниң илгири сүрүшичә, хитайниң юқириқи уқумларға бәргән тәбири интайин мүҗмәл болғачқа мутләқ көп қисим уйғурлар асасән шаллинип кетидикән. Хитай таратқулириниң ашкарилишичә, районда 90 пирсәнттин артуқ уйғурниң хизмәт илтимаси қобул қилинмайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.