Хитай «уйғур районида саяһәтчиликниң раваҗланғанлиқи һәммә ишниң җайида икәнликини көрситиду,» дегән

Мухбиримиз ирадә
2018-09-20
Елхәт
Пикир
Share
Принт

Хитай һөкүмитиниң уйғур елида милйонлиған кишиләрни «йепиқ тәрбийә» лагерлириға қамап, инсанийәткә қарши җинайәт өткүзүватқанлиқи дуняға кәң ашкарилиниватқан бир пәйттә хитай ташқи ишлар министирлиқи баянат елан қилип, уйғур елида һәммә ишниң җайида икәнликини илгири сүргән.

Ройтерс агентлиқиниң бу һәқтики хәвиригә қариғанда, хитай ташқи ишлар министирлиқиниң баянатчиси гең шуаң 20-сентәбир күнидики ахбарат елан қилиш йиғинида уйғур елида «һазир вәзийәтниң интайин муқимлиқини вә кишиләрниң дини әркинликтин толуқ бәһримән болуватқанлиқи» ни илгири сүргән.

У буниң испати сүпитидә өткән бир йил ичидә уйғур елигә барған саяһәтчиләр саниниң 100 милйондин ашқанлиқи, бу йилниң дәсләпки 7 ейидики саяһәтчи саниниң болса 78 милйонға йәткәнликини илгири сүрүп, «әгәр шинҗаң бихәтәр болмиған болса, бунчилик көп хитай вә чәтәллик саяһәтчи бармиған болатти,» дегән.

Һалбуки, чәтәлләрдики көзәткүчиләр хитай һөкүмитиниң бир милйондин ошуқ уйғурни лагерларға қамап болғандин кейин, андин ичкиридики хитайларни һәдәп уйғур елини саяһәт қилишқа үндәватқанлиқини, хитайниң рәсмий тор бәтлиридә хитай пуқралириға «шинҗаңға саяһәткә бериш арқилиқ дөләт сияситини қоллаш» ни очуқ-ашкара чақириқ қилинғанлиқини билдүрди.

Ройтерс агентлиқиму өз хәвиридә хитай һөкүмити гәрчә уйғур аптоном районини әң яхши саяһәт мәнзили дәп тәшвиқ қиливатқан болсиму, әмма районға барған чәтәл ахбарат хадимлириниң сақчиларниң еғир тәқиблиригә учраватқанлиқини әскәрткән.

Пикирләр (0)
Share
Толуқ бәт