Xitay "Uyghur rayonida sayahetchilikning rawajlan'ghanliqi hemme ishning jayida ikenlikini körsitidu," dégen

Muxbirimiz irade
2018-09-20
Share

Xitay hökümitining Uyghur élida milyonlighan kishilerni "Yépiq terbiye" lagérlirigha qamap, insaniyetke qarshi jinayet ötküzüwatqanliqi dunyagha keng ashkariliniwatqan bir peytte xitay tashqi ishlar ministirliqi bayanat élan qilip, Uyghur élida hemme ishning jayida ikenlikini ilgiri sürgen.

Roytérs agéntliqining bu heqtiki xewirige qarighanda, xitay tashqi ishlar ministirliqining bayanatchisi géng shu'ang 20-séntebir künidiki axbarat élan qilish yighinida Uyghur élida "Hazir weziyetning intayin muqimliqini we kishilerning dini erkinliktin toluq behrimen boluwatqanliqi" ni ilgiri sürgen.

U buning ispati süpitide ötken bir yil ichide Uyghur élige barghan sayahetchiler sanining 100 milyondin ashqanliqi, bu yilning deslepki 7 éyidiki sayahetchi sanining bolsa 78 milyon'gha yetkenlikini ilgiri sürüp, "Eger shinjang bixeter bolmighan bolsa, bunchilik köp xitay we chet'ellik sayahetchi barmighan bolatti," dégen.

Halbuki, chet'ellerdiki közetküchiler xitay hökümitining bir milyondin oshuq Uyghurni lagérlargha qamap bolghandin kéyin, andin ichkiridiki xitaylarni hedep Uyghur élini sayahet qilishqa ündewatqanliqini, xitayning resmiy tor betliride xitay puqralirigha "Shinjanggha sayahetke bérish arqiliq dölet siyasitini qollash" ni ochuq-ashkara chaqiriq qilin'ghanliqini bildürdi.

Roytérs agéntliqimu öz xewiride xitay hökümiti gerche Uyghur aptonom rayonini eng yaxshi sayahet menzili dep teshwiq qiliwatqan bolsimu, emma rayon'gha barghan chet'el axbarat xadimlirining saqchilarning éghir teqiblirige uchrawatqanliqini eskertken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.