Уйғур аптоном районлуқ сиясий кеңәш йиғин өткүзүп, адвукатларни күчәйтишни музакирә қилған

Мухбиримиз әркин
2021.04.23

Уйғур аптоном районлуқ сиясий мәслиһәт кеңиши 21-апрел йиғин өткүзүп, “шинҗаңда адвокатлар қошуниниң қурулушини күчәйтиш”, “адвокатларниң қанун мулазимитигә қатнишиш механизмини мукәммәлләштүрүш” мәсилисини музакирә қилған. Адвокатларниң ролини күчәйтиш тоғрисидики бу йиғинниң хитай һөкүмити уйғурларға “ирқий қирғинчилиқ” қилиш, милйонлиған кишини қанунсиз лагер вә түрмиләргә қамаш билән әйиблинип, уйғур елидә мустәқил тәкшүрүш елип бериш һәққидики бесимға дуч кәлгән мәзгилдә ечилиши диққәт қозғиған.

“шинҗаң гезити” ниң хәвәр қилишичә, уйғур аптоном районлуқ сиясий кеңәшниң рәиси нурлан абдумәнҗинниң риясәтчикидә өткүзүлгән йиғинда, адвокатларниң қанун мулазимитигә қатнишиш хизмәт механизмини мукәммәлләштүрүш, адвокатларни тәрбийәләшниң йеңи йоллирини ечиш, шинҗаңниң оттура асиядики дөләтләр билән болған адвокат алмаштуруш һәмкарлиқини күчәйтиш, түзүмни мукәммәлләштүрүп, адвокатлар қошуниниң қурулушини күчәйтишни тәләп қилинған.

Йиғинда йәнә адвокатлиқ орунлириниң чәт җайларда вә чегра наһийәләрдә тармақ понкитлирини ечиш, қош тиллиқ вә чәтәлгә мунасивәтлик адвокатларни тәрбийәләшни күчәйтиш тәләп қилинған. Хитайниң һөкүмити 2017-йили башланған чоң тутқунда милйонлиған уйғурни лагерларға қамап, уларниң ичидики нурғун кишиләрни адвокатсиз, кишиләргә өзини ақлаш һоқуқи бәрмәстин кесивәткән. Чәтәлдики бәзи уйғур аилә әзалириниң билдүрүшичә, бу җәрянда лагердикиләрниң из дерикини қилиш үчүн адвокат тутушму мумкин болмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.