«Қара күчләр вә рәзилликкә зәрбә бериш» һәрикитиниң техиму кеңийидиғанлиқи алға сүрүлмәктә

Мухбиримиз әзиз
2019-05-01
Елхәт
Пикир
Share
Принт

Уйғур дияридики «икки йүзлимичиләрни тазилаш» һәрикитидин кейин оттуриға чиққан «қара күчләргә вә рәзилликкә зәрбә бериш һәрикити» ниң буниңдин кейин техиму зор көләмдә иҗра болидиғанлиқи мәлум болмақта.

«Соху тори» ниң 30-апрелдики хәвиридә ейтилишичә, бир күн аввал «қара күчләргә вә рәзилликкә зәрбә бериш» мәркизий ишханисиға қарашлиқ 21-назарәт гурупписи уйғур аптоном районлуқ парткомниң каттивашлири билән үрүмчидә мәхсус йиғин ачқан. Чен чуәнго, шөһрәт закир қатарлиқ хитай әмәлдарлири өзлириниң бу җәһәттики хизмәтлиридин мәлуматлар бәргәндин кейин, 21-назарәт гурупписиниң башлиқи соң дахән бу һәрикәт җәрянида сиясий мәвқә, универсал түзәш, чоңқур қезиш қатарлиқ алтә җәһәттә сақлиниватқан мәсилиләрни көрситип өткән һәмдә буни түзитишни тәләп қилған. Шундақла ши җинпиңниң «шинҗаңни идарә қилиш истратегийәсиниң тәлипи бойичә ‹қара күчләргә вә рәзилликкә зәрбә бериш һәрикити' ни шинҗаңниң муқимлиқиға мунасивәтлик зор бир сиясий вәзипә қатарида иҗра қилиш» һәққидә йолйоруқ бәргән. 

Чен чуәнго буниңға қарита «мәркәзниң көрсәтмилирини әстә сақлап, хизмәттә көрүлгән кәмтүклүкни толдуридиғанлиқини, шуниңдәк буниңдин кейинки хизмәтләрни техиму яхши қанат яйдуруп, ‹қара күчләргә вә рәзилликкә зәрбә бериш' ни ши җинпиңниң муһим көрсәтмилириниң роһи қанаәт тапқудәк бәҗа кәлтүридиғанлиқи» ни билдүргән. 

Анализчилар бу һәқтә пикир қилип, «бу хитай мәркизий һөкүмитиниң уйғурларға қаратқан бастурушни техиму күчәйтиш һәққидә баш қатуруватқанлиқиниң ипадиси,» деди.

Пикирләр (0)
Share
Толуқ бәт