“Qara küchler we rezillikke zerbe bérish” herikitining téximu kéngiyidighanliqi algha sürülmekte

Muxbirimiz eziz
2019.05.01

Uyghur diyaridiki “Ikki yüzlimichilerni tazilash” herikitidin kéyin otturigha chiqqan “Qara küchlerge we rezillikke zerbe bérish herikiti” ning buningdin kéyin téximu zor kölemde ijra bolidighanliqi melum bolmaqta.

“Soxu tori” ning 30-apréldiki xewiride éytilishiche, bir kün awwal “Qara küchlerge we rezillikke zerbe bérish” merkiziy ishxanisigha qarashliq 21-nazaret guruppisi Uyghur aptonom rayonluq partkomning kattiwashliri bilen ürümchide mexsus yighin achqan. Chén chu'en'go, shöhret zakir qatarliq xitay emeldarliri özlirining bu jehettiki xizmetliridin melumatlar bergendin kéyin, 21-nazaret guruppisining bashliqi song daxen bu heriket jeryanida siyasiy mewqe, uniwérsal tüzesh, chongqur qézish qatarliq alte jehette saqliniwatqan mesililerni körsitip ötken hemde buni tüzitishni telep qilghan. Shundaqla shi jinpingning “Shinjangni idare qilish istratégiyesining telipi boyiche ‛qara küchlerge we rezillikke zerbe bérish herikiti‚ ni shinjangning muqimliqigha munasiwetlik zor bir siyasiy wezipe qatarida ijra qilish” heqqide yolyoruq bergen. 

Chén chu'en'go buninggha qarita “Merkezning körsetmilirini este saqlap, xizmette körülgen kemtüklükni tolduridighanliqini, shuningdek buningdin kéyinki xizmetlerni téximu yaxshi qanat yaydurup, ‛qara küchlerge we rezillikke zerbe bérish‚ ni shi jinpingning muhim körsetmilirining rohi qana'et tapqudek beja keltüridighanliqi” ni bildürgen. 

Analizchilar bu heqte pikir qilip, “Bu xitay merkiziy hökümitining Uyghurlargha qaratqan basturushni téximu kücheytish heqqide bash qaturuwatqanliqining ipadisi,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.