Керийә наһийәсидики дәря бойи йезисиниң аһалиси пүтүнләй көчүрүветилгән

Мухбиримиз ирадә
2019.10.17

Хитайниң шинхуа тори 17-өктәбир күни елан қилған бир парчә хәвәргә қариғанда, керийә наһийәсиниң тәклимакан қумлуқиниң оттурисиға җайлашқан қәдимий юрт дәря бойи йезисиниң аһалисини көчүрүветиш хизмити толуқ тамамланған.

Шинхуа тори бу һәқтики хәвиридә бу йил 27-синтәбир күни дәря бойи йезисида қалған ахирқи 114 аиләниң көчүрүлгәнлики вә буниң дәвр бөлгүч характирлиқ тарихий вәқә икәнликини баян қилған. 

Хитай һөкүмити 2017-йилидин башлап дәрябойи йезисидики аһалиләрни көчүрүш хизмитини башлиған. Истатескилардин қариғанда, 1342 нопусқа игә дәрябойи йезисида җәмий 369 аилә бар болуп, бу йил 4-айда хитай ахбаратлири 102 аилиниң керийә наһийәсигә 90 километир келидиған бир җайдики опчә өйләргә көчүрүлгәнликини хәвәр қилған. 

Шинхуа тори бу һәқтики хәвиридә әвладму-әвлад иптидаий һаяттин қутулалмиған йеза хәлқиниң һазир партийә вә һөкүмәтниң ғәмхорлуқи астида заманиви өйләргә көчүп киргәнликини давраң салған болсиму, әмма әвладму-әвлад шу земинларда чарвичилиққа тайинип яшап кәлгән бу аһалиләрниң әмди немигә тайинип җан бақидиғанлиқини тилға алмиған. 

Хитай һөкүмәт таратқулири 1980‏-йиллири тәклимакан қумлуқидин иптидаий инсанларниң байқалғанлиқи һәққидә хәвәр берип, әсирләрдин бери керийәниң 270 километир шималидики дәря бойи йезисида яшап келиватқан уйғурларни “иптидаий инсанлар” дәп хата учур тарқатқан. Шуниңдин кейин дәря бойи йезиси саяһәтчиләр вә тәтқиқатчиларниң қизиқиш нуқтисиға айлинип қалған иди. 

Чәтәлләрдики уйғур көзәткүчиләрниң қаришичә, хитай һөкүмити дәрябойидики йәрлик хәлқләрни әслидики орунлиридин йөткәп уларни тәбиий яшаш муһитидин айрип ташлиған болуп, улар бу арқилиқ тәклимакандики дәря бойи бостанлиқларни йәниму кәң ечип, хитай көчмәнләрни йәрләштүрүшкә тәйярлиқ қиливатқан болуши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.