Kériye nahiyesidiki derya boyi yézisining ahalisi pütünley köchürüwétilgen

Muxbirimiz irade
2019.10.17

Xitayning shinxu'a tori 17-öktebir küni élan qilghan bir parche xewerge qarighanda, kériye nahiyesining teklimakan qumluqining otturisigha jaylashqan qedimiy yurt derya boyi yézisining ahalisini köchürüwétish xizmiti toluq tamamlan'ghan.

Shinxu'a tori bu heqtiki xewiride bu yil 27-sintebir küni derya boyi yézisida qalghan axirqi 114 a'ilening köchürülgenliki we buning dewr bölgüch xaraktirliq tarixiy weqe ikenlikini bayan qilghan. 

Xitay hökümiti 2017-yilidin bashlap deryaboyi yézisidiki ahalilerni köchürüsh xizmitini bashlighan. Istatéskilardin qarighanda, 1342 nopusqa ige deryaboyi yézisida jem'iy 369 a'ile bar bolup, bu yil 4-ayda xitay axbaratliri 102 a'ilining kériye nahiyesige 90 kilométir kélidighan bir jaydiki opche öylerge köchürülgenlikini xewer qilghan. 

Shinxu'a tori bu heqtiki xewiride ewladmu-ewlad iptida'iy hayattin qutulalmighan yéza xelqining hazir partiye we hökümetning ghemxorluqi astida zamaniwi öylerge köchüp kirgenlikini dawrang salghan bolsimu, emma ewladmu-ewlad shu zéminlarda charwichiliqqa tayinip yashap kelgen bu ahalilerning emdi némige tayinip jan baqidighanliqini tilgha almighan. 

Xitay hökümet taratquliri 1980‏-yilliri teklimakan qumluqidin iptida'iy insanlarning bayqalghanliqi heqqide xewer bérip, esirlerdin béri kériyening 270 kilométir shimalidiki derya boyi yézisida yashap kéliwatqan Uyghurlarni “Iptida'iy insanlar” dep xata uchur tarqatqan. Shuningdin kéyin derya boyi yézisi sayahetchiler we tetqiqatchilarning qiziqish nuqtisigha aylinip qalghan idi. 

Chet'ellerdiki Uyghur közetküchilerning qarishiche, xitay hökümiti deryaboyidiki yerlik xelqlerni eslidiki orunliridin yötkep ularni tebi'iy yashash muhitidin ayrip tashlighan bolup, ular bu arqiliq teklimakandiki derya boyi bostanliqlarni yenimu keng échip, xitay köchmenlerni yerleshtürüshke teyyarliq qiliwatqan bolushi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.