Хитайниң аватлиқ уйғурларни долан қәбилиси, дәп елан қилип, айрим етник гәвдидәк муамилә қилиши тәнқидкә учриди

Мухбиримиз әркин
2019-10-28
Елхәт
Пикир
Share
Принт

Хитай таратқулириниң хәвәр қилишичә, нөвәттә уйғурларниң долан мәдәнийити хитай саяһәтчилирини алаһидә җәлп қилидиған саяһәт нуқтисиға айланған. Хитай таратқулириниң бу һәқтики хәвәрлиридә, ават наһийәсидики «долан қәбилси мәнзирә райони», долан мәшрипи, долан муқами, йәрлик хәлқниң турмуши усули, өрп-адити вә һәр хил хәлқ оюнлириниң җәлпкарлиқини ашурғанлиқи, бу йилниң дәсләпки 3 пәслидә ават наһийәсиниң аз кәм бир милйон хитай саяһәтчи күтүвалғанлиқи илгири сүрүлмәктә.

«Җоңго хәвәрләр тори» ниң учурида, аз кәм бир милйон саяһәтчиниң 500 милйон йүән хәҗлигәнлики илгири сүрүлгән. Хәвәрдә қәйт қилинишичә, өткән һәптә ават наһийәсидә өткүзүлгән 15‏-нөвәтлик күсән-долан мәдәнийәт байрими вә 6 ‏-нөвәтлик долан мусәлләс байрими техиму көп хитай саяһәтилирини җәлп қилиш ролини ойнайдикән. Лекин, хитай һөкүмитиниң ават наһийәләрдики уйғурларға «долан қәбилиси» дегән намда пәрқлиқ етник гуруппидәк муамилә қилиши вә уларни саяһәтчиләргә шундақ тонуштуруши хитайниң мәқситигә қарита гуман пәйда қилмақта. Көзәткүчиләрниң қаришичә, хитай һөкүмити бу районда сияси ғәрәзлик саяһәт паалийити қанат яйдурмақтикән. Улар, хитайниң, бу ғәрәзлик саяһәт паалийәтлиридә уйғур миллити вә мәдәнийитиниң муһим тәркиби қисми болған доланлиқларни вә уларниң йәрлик муқам, мәшрәп вә өрп адәтлирини, шундақла турмуш усуллирини пәрқлиқ бир мәдәнийәт, пәрқлиқ бир етник гуруппидәк тонуштуриватқанлиқини билдүрмәктә. Уларниң қаришичә, хитай һөкүмити «доланлиқлар», «долан қәбилиси» дегән сөзлүкләр арқилиқ кишиләрниң еңида «доланлиқлар» пәрқлиқ мәдәнийәт вә етник гуруппа, дәйдиған уқумни шәкилләндүрүп, уйғур ортақ кимликини парчилашқа урунмақта икән. Һалбуки, «җоңго хәвәрләр тори» қатарлиқ хитай таратқулириниң бу һәқтики хәвәрлиридә, доланлиқларниң «мәдәнийәт пәрқи» алаһидә гәвдиләндүрүлүп, уларниң уйғур кимлики тәкитләнмигән.

Пикирләр (0)
Share
Толуқ бәт