Xitay da'iriliri “Uyghur aptonom rayonluq sodiyelerni jazalash komitéti” qurghan

Muxbirimiz irade
2021-11-18
Share

Xitayning “Xelq tori” tarqatqan xewerdin qarighanda, 11-ayning 16-küni xitay da'iriliri “Shinjang Uyghur aptonom rayonluq sodiyelerni jazalash komitéti” qurghan. Sodiyelerni jazalash komitéti 18 kishidin terkib tapqan bolup, bir neper mudir eza, töt neper mu'awin mudir eza, töt neper mutexessis eza, toqquz neper sodiye wekil ezasini öz ichige alidiken.

Xewerde sodiyelerni jazalash komitétining xizmet mes'uliyiti heqqide töwendikiler déyilgen: “Jazalash komitéti nizamnamisini tüzüsh we uninggha tüzitish kirgüzüsh؛ xelq sot mehkimisi tekshürüsh ehwaligha asasen, tertip boyiche sodiyelerning sot qilish mes'uliyitige xilapliq qilghan-qilmighanliqini tekshürüp békitish, qesten mes'uliyetke xilapliq qilghan, zor sewenlik ötküzgen, adettiki sewenlik saqlan'ghan yaki mes'uliyitige xilapliq qilmighanliqigha qarita pikirni otturigha qoyush؛ sodiyelerning tekshürüsh pikrige qarita bashqiche pikir iltimasini qobul qilip qarar chiqirish؛ nazaret qilish we jazalash komitéti ishxanisining xizmitige yétekchilik qilish؛ sodiyelerni jazalash xizmitige munasiwetlik bashqa ishlarni qarap chiqish arqiliq qarar qilish qatarliqlar”.

Xitay hökümiti téxi bir ay aldida Uyghur élida 19 kishidin teshkil tapqan “Shinjang Uyghur aptonom rayonluq teptishler intizam komitéti” ni qurup, teptishlerning xizmitini qattiq nazaret qilidighanliqini jakarlighan idi.

Xitay da'iriliri buni “Edliye sistémisi islahatini ilgiri sürüshning muhim tedbiri” dep teshwiq qilghan bolsimu, biraq 2007-yilida bashlan'ghan keng kölemlik tutqundin kéyin edliye sépidiki nurghun Uyghur kadirlirini “Merkezning yéngi dewrdiki shinjangni bashqurush istratégiyesini emeliyleshtürüshke qarshi chiqti yaki xizmette keskin bolmidi” dégen seweb bilen jazalighan idi. Bu qétim “Uyghur aptonom rayonluq sodiyelerni jazalash komitéti” deydighan sotning üstide turudighan alahide hoququqluq bir organning qurulushi, xitayning Uyghur diyaridiki sot sistémisini qanundin halqighan kontrolluqqa alidighanliqining bir bishariti iken.

Da'iriler yene Uyghur élida “Merkezning 8 türlük belgilisimige xilapliq qilish” dégen nam bilen asasiy qatlamlardiki asasliq Uyghur kadir-emeldarlarnimu jazalighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet