Күрәдики или генирал мәһкимиси билән керийәдики қурбан тулум сарийи «милләтләр иттипақлиқи тәрбийә базиси» қилип бекитилгән

Мухбиримиз шөһрәт һошур
2019-11-29
Share

«Шинҗаң гезити» ниң29 ‏-ноябирдики санида хәвәр қилинишичә, қорғас наһийәсиниң күрә йезисиға җайлашқан тарихий орунлардин или генирал мәһкимиси билән керийә наһийәсидики қурбан тулум хатирә сарийи уйғур районидики «милләтләр иттипақлиқини илгири сүрүш тәрбийә базиси» қатариға киргүзүлгән.

Хәвәрдә или генирал мәһкимисиниң бир йерим әсирлик тарихқа игә икәнлики, униң уйғур райони билән хитай дөлити арисидики тарихий мунасивәтни әкс әттүридиғанлиқи, йәни райондики һәр милләт хәлқиниң таҗавузчилиққа вә миллий бөлгүнчиликкә ортақ қарши туруп кәлгәнликиниң намайәндиси икәнлики илгири сүрүлгән. Әмма мустәқил тарихчилар илидики генирал мәһкимисини хитай мустәмликичиликиниң уйғур елидики мустәмликичилик символи дәп қарап кәлмәктә. 

Хәвәрдә әскәртилишичә, керийәдики қурбан тулум хатирә сарийида мав зедоңниң қурбан тулум билән чүшкән сүрити билән бирликтә ши җинпиңниң қурбан тулумниң нәврилиригә язған хети көргәзмигә қоюлған. Қурбан тулум йиллардин буян уйғур җәмийитидә миллий аңсизлиқниң вә әхмәқлиқниң символи сүпитидә мәсхиригә учрап келиватқан бир образдур. Муһаҗирәттики уйғур көзәткүчиләр хитай тәрәпниң или генирал мәһкимисини тәшвиқат мәркизигә айландуруш арқилиқ хитай пуқралирида милләтчиликни ойғитишни көзлигән болса, қурбан тулумни көтүрүп чиқиш арқилиқ уйғурлар арисида қулчилиқ идийәсини кеңәйтишни көзлигәнликини илгири сүрмәктә. 

Мәзкур хәвәрдә дейилишичә, йоқирида тилға елинған икки орунни қошқанда уйғур районидики «милләтләр иттипақлиқи тәрбийә базиси» ниң сани нөвәттә 14 кә көпәйгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.