Xitay hökümiti Uyghur rayonidiki “Xatirjem öy” qurulushigha 1 milyard 400 milyon yüen ajratqan

Xitayche “Shinjang géziti” torining 21-dékabirdiki xewirige qarighanda, xitay maliye ministirliki Uyghur rayonidiki sheher-bazarlarda 2021-yil élip bérilidighan “Xatirjem öy” qurulushigha 1milyard 400 milyon yüen yardem meblighi ajratqan.

Xewerde éytilishiche, aptonom rayon 250ming yürüsh opche ijare öy sélish, 64ming yürüsh kona öyni özgertish, 230 mingdin artuq nopus jaylashqan kona mehellilerni özgertish üchün merkezge iltimas sun'ghan bolup, pilan boyiche 7135 bina sélinidiken, 1714 mehelle qurulidiken. Merkezdin meblegh chüshkendin kéyin aldi bilen kona öy we kona mehellilerni chéqip özgertish qurulushi bashlinidiken.

Tehlilchilerning qarishiche, xitay hökümitining aldi bilen kona öy, kona mehellilerni özgertish qurulushi élip bérishi Uyghurlarning nechche on yildin béri saqlap kelgen mehelliwi turmush muhiti, ata-bowiliridin miras qalghan öy medeniyiti, hoyla-aram igiliki we en'eniwi turmush sheklini tamamen weyran qiliwétish bolup, yene bir tereptin xitay köchmenlirining bu mehellilerge bimalal orunlishishigha paydiliq shara'it yaritip bérish üchün iken.