Xitayning Uyghur rayonidiki sot tarmaqliri yéqinqi 3 yilda 300 ming déloni bir terep qilghan

Muxbirimiz erkin
2019-04-19
Élxet
Pikir
Share
Print

Xitayning Uyghur rayonidiki sot tarmaqliri yéqinqi 3 yil ichide 300 ming déloni bir terep qilip, 70 ming kishini "Qara tizimlik" ke kirgüzgen.

"Junggo xewerler" torining 18‏-aprél ashkarilishiche, Uyghur aptonom rayonluq aliy sotning bayanatchisi wang xeychin rayondiki her qaysiy sot tarmaqlirining yéqinqi 3 yil ichide 322 ming 81 délo tapshuruwélip, 302 ming 910 déloni bir terep qilghanliqi, bu arqiliq "Xelqning inkasi küchlük bolghan körünerlik mesililerni hel qilghanliqi" ni bildürgen. U "Ijra qilish qiyin bolghan mesililer asasen hel qilinip, bu basquchluq nishan waqtida ishqa ashuruldi" dégen. Lékin wang xeychin "Ijra qilish qiyin bolghan" bu mesililerning qandaq mesile ikenliki, shuningdek 3 yil ichide bir terep qilin'ghan 300 mingdin artuq déloning qaysiy mesililerge chétilidighanliqini chüshendürmigen.

Xitay hökümiti 2017‏-yili féwraldin bashlap Uyghur rayonida keng kölemlik tutqun bashlap, 2 milyondek kishini yighiwélish lagérlirigha qamighan. Lagérdiki bir qisim tutqunlarni kolléktip qamaq jazalirigha höküm qilip, ichkiri xitay ölkiliridiki türmilerge yötkigen. Xitayning bu qilmishi xelq'arada "Insaniyetke qarshi jinayet" dep eyiblen'gen idi.

"Junggo xewerler" tori "Qara tizimlik" ke kirgüzülgen 70 ming kishining özining "Mejburiyitini ada qilmay ishenchini yoqatqan kishiler" ikenlikini ilgiri sürgen. "Qara tizimlik" tiki 60 mingdek kishining yoluchilar ayropilanida seper qilishi, 14 mingdek kishining poyizgha olturushi cheklen'gen. Uyghur kishilik hoquq teshkilatlirining ilgiri sürüshiche, xitay hökümiti nurghun Uyghurlarning kimlikige diniy, siyasiy we milliy téndinsiyesi seweblik qizil chékip qoyup qoyghachqa, ularning ayropilan we poyizgha olturup seper qilishi qattiq kashiligha uchrimaqta iken.

Toluq bet