Xitay hökümiti Uyghur we bashqa "Nuqtiliq" shexslerning téléfonlirini hujum nishani qilmaqta

Muxbirimiz eziz
2019-10-22
Élxet
Pikir
Share
Print

Xitay hökümitining yuqiri pen-téxnikining yardimide muhajirettiki Uyghur pa'aliyetchiler we bashqa közge körün'gen shexslerning téléfonlirini "Ow nishani" qilishni kücheytishi yéqindin buyan köplep melum bolmaqta.

Amérika hökümitining tor jasusluqigha qarshi turush mehkimisidiki xadimlardin jéymis lyuwis bu mesilide köpchilikni agahlandurup "Xitay xakkérliri bu usulni xitay hökümiti eng qorqidighan xelqlerge aldi bilen tetbiqlawatidu" dep körsetti.

"Nyu-york waqti" gézitining 22-öktebir sanigha bésilghan bu heqtiki maqalida körsitilishiche, xitay hökümitining bu xil qilmishi yéqindiki NBA gha chétishliq "Xongkongni qollash" herikitidin kéyin téximu köp melum bolghan. Maqalida körsitilishiche, xitay hökümitining Uyghurlar diyaridiki omumiy nazaret méxanizmi minglighan közitish kaméraliri arqiliq dawam qiliwatqan bolsa, buning chet'elge uzarghan "Nusxa" si chet'ellerdiki közge körün'gen pa'aliyetchilerning eqliy téléfonlirini hujum nishani qilish bilen ishqa ashmaqta iken.

Go'ogle mutexessislirining pikriche, nöwette "Alma" we "Andro'id" téléfonliridiki qismen yochuqlar xitay xakkérlirining Uyghurlarni nishan qilghan halda tor bet ziyaretchilirini "Yuqumlandurush" igha yol échip bermekte iken. Wirjiniye shitatidiki "Woléksiti" bixeterlik shirkitining re'isi stéwén ada'ir bu heqte toxtilip "Eqliy téléfon'gha hujum qilish arqiliq xakkérlar xitayda uruq-tughqini bolghan hemde Uyghur dawasini qollawatqan bir Uyghurni ongayla nishan qilalaydu" dégen. Uning pikriche, Uyghurlar diyaridiki Uyghurlar arisida "Alma" yaki "Andro'id" téléfoni ishlitidighanlar anche köp bolmisimu, chet'eldiki Uyghurlar arisida undaq emes iken.

Melum bolushiche, xitay xakkérliri közlen'gen shexsning eqliy téléfonini hujum nishani qilghandin kéyin ündidar uchuri arqiliq "Nyu-york waqti" géziti yaki "Xelq'ara kechürüm teshkilati" dégendek orunlarning namidin otturigha chiqidiken. Ilgiri xitay xakkérlirining hujumi "Türmidin qachurulghan", yeni mudapi'e tosuqi yéshiwétilgen hemde "Alma" shirkitining resmiy magizinidin bashqa torlardin chüshürülgen eplerni ornitishqa yol qoyidighan téléfonlardila ishligen bolsa, hazir eng yéngi "Alma" téléfonida bimalal meshghulat qilalaydiken.

Toluq bet