Уйғур елидики иҗтимаий пән мутәхәссислири асасий қатламда “партийәниң шәпқитигә миннәтдарлиқ билдүрүш” ни тәшвиқ қилишқа орунлаштурулған

Мухбиримиз ирадә
2019.11.22

Қәшқәр хәвәрләр тори тарқатқан бир хәвәрдин қариғанда, уйғур аптоном районниң иҗтимаий пән мутәхәссислири “асасий қатлам сәпири бойичә пәнни омумлаштуруш тәшвиқати” дәйдиған бир һәрикәткә тәшкилләнгән.

Униңда ейтилишичә, уйғур аптоном районидики һәрқайси унверсититларниң мутәхәссис, профессорлири, һәрқайси жорналларниң баш муһәррир, тәкшүрүп бекиткүчи вә алий тәрҗиманлиридин тәшкилләнгән тәшвиқат өмики асасий қатламларға чүшүп “мән вә вәтиним” темиси бойичә лексийә сөзләп тәшвиқат елип баридикән. 18-Ноябир күни тунҗи мәйдан елип берилған болуп, у йәнә қәшқәр вилайитиниң һәр қайси йеза-базар, кәнт-мәһәллилиридә давам қилидикән. Хәврәдә мундақ дийилгән: 

“тәшвиқатқа қатнашқан иҗтимаий пән мутәхәссислири. . . Зағра тилда шинҗаңниң һекайилирини яхши сөзләп, һәр милләт кадирлар, аммини техиму аңлиқ һалда қәтий тәврәнмәй партийәниң шәпқитигә миннәтдарлиқ билдүрүш, партийәниң сөзини аңлаш, партийәгә әгишип меңишқа йетәклиди, һәр милләт хәлқниң идийәви асасини мустәһкәмләп, партийәниң йеңилиқ яритиш нәзәрийәсиниң ‛адәттики пуқраларниң өйигә кириш‚ини илгири сүрди”.

Иҗтимаий пән саһәси уйғур елидә 2017-йилидин йолға қоюлуватқан лагерға солаш һәрикитидә әң еғир зәрбигә учриған саһә болуп, уйғурларниң бу саһәдә көзгә көрүнгән йүзлигән мутәхәссис, профессорлири, әдиблири, тәһрир-муһәррирлири һелиһәм из-дерәксиз турмақта. Бундақ бир әһвалда лагер сиртидики иҗтимаий пән мутәхәссислириниң һазир асасий қатламларда тәшвиқат хизмитигә селиниватқанлиқи диққәт қозғайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.