Ақсудики сақчи тармақлириға компартийәгә садиқ болуш тәшвиқати елип берилған

Мухбиримиз ирадә
2019.11.22

Уйғур районида йәнә “партийәгә қәтий садиқ болуш, интизамни қаттиқ чиңитиш” дәйдиған бир һәрикәтниң омумйүзлүк иҗра қилиниватқанлиқи мәлум.

Ақсу хәвәрләр тори тарқатқан хәвәрдин мәлум болушичә, 20-ноябир күни ақсуда “2019  йиллиқ җ х оргинидики сақчиларниң тасаддипий вәқәләрни бир тәрәп қилиш күчлириниң маһарәт мусабиқиси” өткүзүлгән.

Бирақ хәвәрдин қариғанда, бу мусабиқиниң асаслиқ мәқситиниң йәнила компартийәгә садақәтмән болушни тәкитләш болғанлиқи мәлум. Хәвәрдә мусабиқиниң мәқсити һәққидә төвәндикиләр баян қилинған: “вилайәттики һәр дәриҗилик җ х органлири вә барлиқ җ х кадир сақчилири ши җинпиңниң йеңи дәвр җуңгочә сотсиялизм идийәсини әстайдил өгинип, “партийәгә қәтий садиқ болуш, “төт аң” ни техиму күчәйтип, “төт ишәнч” ни мустәһкәмләш керәк. Сиясий җәһәттин мәшиқләндүрүш, сапа җәһәттин мәшиқләндүрүш, әмәлий җәң җәһәттин мәшиқләндүрүшни күчәйтип, иҗтимаий муқимлиқ вә әбәдий әминлик баш нишанини ишқа ашурушқа тегишлик төһпә қошуши керәк”.

Йеқиндин буян, хитай даирилириниң уйғур елида һәрқатламда “партийә билән идийәдә бирдәкликни сақлаш, ши җинпиң идийәсидин қәтий тәврәнмәслик” ни қаттиқ тәкитләватқанлиқи диққәт қозғимақта. Чәтәлләрдики уйғур көзәткүчиләр буниң хитайниң уйғур елидики сиясәтлиригә алақидар ички һөҗҗитиниң ашкарилинип кетиши билән мунасивәтлик икәнликини мөлчәрлимәктә. Чүнки “ню-йорк вақти” гезити бу һөҗҗәтләрни хитайниң сиясий рәһбәрлик қатлимидики бир кишидин, йәни ши җинпиң қатарлиқларниң зор көләмлик тутқун үчүн җазаға тартилишини үмид қилидиған бир кишидин алғанлиқини билдүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.