Héytgah jama'esining imami lagérlarni "Ademni dawalap, késelni saqaytish orunliri" dep aqlidi

Muxbirimiz erkin
2019-12-06
Élxet
Pikir
Share
Print

Xitay hökümiti amérika awam palatasining "Uyghur kishilik hoquq qanun layihesi" ni maqullishigha qarita Uyghur aptonom rayonidiki hökümet organlirini, ijtima'iy teshkilat we shexslerni seperwer qilip, mezkur qanun layihesige dawamliq hujum qilmaqta. Bu hujumlarda lagérlarning mewjutluqini inkar qilinmighan bolsimu, emma "Kespiy terbiyelesh" namidiki bu orunlarning "Térrorluq", "Esebiylikke" qarshi zörür tedbir ikenliki ilgiri sürülgen. Amérika awam palatasining "Uyghur 2019‏" namliq qanun layihesi Uyghur we bashqa musulmanlarni keng kölemlik lagérlargha qamap, kishilik hoquqini depsende qiliwatqan xitay emeldarlirini jazalash, shundaqla amérika téxnikisining Uyghur rayonidiki basturushta ishlitilishini cheklesh qatarliq mezmunlarni öz ichige alghan. Qanun layiheside yene chén chüen'goning ismi alahide tilgha élin'ghanidi. "Tengri tagh" torining xewer qilishiche, 6‏-dékabir küni héytgah jama'esining imami memet jüme bayanat élan qilip, "Uyghur kishilik hoquq qanun layihesi" ni tenqidligen.

Memet jüme bayanatida, "Kespiy terbiyelesh merkezlirining chet'eldiki düshmen küchler éytqandek adem tutidighan, solaydighan, qorqunchluq lagér emes, belki adem qutquzidighan, dawalaydighan, adem terbiyeleydighan mektep" ikenlikini ilgiri sürgen. Emma u bayanatida héytgah jama'esining ibadetke taqilip, néme üchün sayahet ornigha aylinip qalghanliqi, meschit jama'itining nege ghayib bolghanliqini chüshendürmigen. Shu küni yene Uyghur aptonom rayonluq ayallar birleshmisi, ittipaq komitéti, yashlar birleshmisi, oqughuchilar birleshmisi qatarliq ammiwi teshkilatlar bayanat élan qilip, amérika dölet mejlisining "Uyghur kishilik hoquq qanuni" arqiliq "Shinjanggha qara chaplighanliqi" ni ilgiri sürgen. Ularning ilgiri sürüshiche, amérika bu qanun arqiliq "Shinjangning muqimliqigha buzghunchiliq qilish, xitayning tereqqiyatini boghushtek meqsitige yetmekchi" iken. Amérika awam palatasidiki mutleq köp awazning qollishida maqullan'ghan mezkur qanun layihesi xitay da'irilirining qattiq naraziliqigha uchrighan bolsimu, lékin chet'eldiki Uyghur muhajirlar bu qanun Uyghurlarni keng kölemlik xorlawatqan xitay hökümitini jawabkarliqqa tartish yolidiki "Muhim tarixiy qedem" dep körsetmekte.

Toluq bet