Корла-голмуд төмүрйолиниң уйғур елидики қисминиң йеримиға релис ятқузулуп болунған

Мухбиримиз әркин
2018-05-28
Share

Уйғур аптоном райониниң җәнубини хитайниң сичүән өлкисигә бағлашни мәқсәт қилған корла-голмуд төмүрйолиниң уйғур елидики 700 километирлиқ бөликиниң йеримиға релис ятқузулуп болунған.

Хитай ахбарат васитилириниң хәвәрлиридә мәзкур төмүрйолниң уйғур елидики 345 километирлиқ қисмиға релис ятқузулуп болунғанлиқи билдүрүлди. Һазир төмүрйолниң релиси чақилиқ наһийәсиниң тетима көлигә йетип кәлгән. Һазир даириләр тетима көлигә селиниватқан көврүкни тез пүттүрүшкә җиддий һәрикәт қилмақта икән.

«Шинҗаң мәркизий шәһәр гезити» ниң хәвиридә узунлуқи 24 километирлиқ тетима көли көврүкиниң бу йил 15‏-авғустқичә пүттүрүлидиғанлиқи билдүрүлгән. Хәвәрдә баян қилинишичә, тетима көврүки омумий узунлуқи 1213 километирлиқ корла -голмуд төмүрйол линийәсидики әң узун көврүк икән. Хитай һөкүмити корла- голмуд төмүрйол қурулушини башлаштин бурун чеңду-голмуд төмүрйол қурулушини башлиған. Хитайниң пилани 2020‏-йилғичә чеңду- голмуд-корла төмүрйолини өз ара туташтутуп, униң ахирқи нуқтисини ғулҗиға улаш икән. Хитай һөкүмити 2010‏- йили чақирилған «шинҗаң хизмәт йиғини» дин кейин уйғур елиниң асасий әслиһәлиригә кәң көләмлик мәбләғ селип, көчмән йөткәшни тезләткән. Әмма бу чәтәлләрдики уйғур тәшкилатлириниң қаттиқ тәнқидигә учриған.

Улар төмүрйол қурулуши көчмәнләрниң шиддәт билән көпийип, уйғурларниң мәдәнийити, турмуши усули, муһити, йәрлик иқтисадиға техиму қаттиқ бузғунчилиқ қилидиғанлиқи, буниң нопус қурулмисини өзгәртип, уйғурларни аз санлиқ орунға чүшүрүп қойидиғанлиқини агаһландуруп кәлди. Лекин хитай һөкүмити корла-голмуд төмүрйоли билән чәклинип қалмай, йеқинда йәнә чақилиқ билән хотән арисида төмүрйол ятқузуш пиланини тәстиқлиған. Хитай ахбарат васитилириниң бу һәқтики хәвәрлиридә хитай дөләтлик ислаһат-тәрәққият комитетиниң бу қурулушқа 22 милярд йүән тәстиқлиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт